के गर्छ एमालेले?
नेपालीलाई नक्कली भुटानी शरणार्थी बनाएर अमेरिका पठाउने अभियोगमा राई अहिले प्रहरी हिरासतमा छन्। इन्द्रजित र उनका छोरा नीरजले २०७६ असारदेखि चैतसम्म ५ करोड ५० लाख रुपैयाँ लिएको पीडितहरूले बताएका छन्। पक्राउ परेकाहरूले पनि त्यही बयान दिएका छन्। उनका छोरा नीरज फरार छन्।
पक्राउ परेका इन्द्रजित एमालेको सल्लाहकार कमिटीमा छन्। उनलाई पार्टीले निलम्बन भने गरेको छैन।
एमालेको सचिवालय बैठक मंगलबार बस्दैछ। यही वैशाख २८ गतेदेखि ३० गतेसम्म केन्द्रीय कमिटीको पाँचौं बैठक पनि काठमाडौंमै बस्दैछ। यस प्रकरणबारे त्यहीँ छलफल हुने प्रचार विभाग उपप्रमुख विष्णु रिजालले जानकारी दिए।
‘यस प्रकरणमा प्रहरी अनुसन्धान जारी छ। निष्कर्ष आइसकेको छैन। हाम्रो सचिवालय र केन्द्रीय कमिटीको बैठक पनि बस्दैछ। त्यहीँ छलफल गरेर निर्णय लिन्छौं,’ उनले भने।
