पर्सामा तोरी बालीको उत्पादनमा वृद्धि, ठोरी गाउँपालिकामा किसानलाई व्यस्तता
-
बिशाल यादब
- today२६ माघ २०८१
वीरगञ्ज । पर्साको तोरी उत्पादनको हब मानिने ठोरी गाउँपालिकाका किसान अहिले तोरी उखेल्न व्यस्त छन्। मंसिर महिनामा छरिएको तोरी पाकिसकेकाले किसानलाई तोरी बाली भित्र्याउन भ्याइ–नभ्याइ भएको छ।ठोरी गाउँपालिकामा तोरी खेती मुख्य नगदेबालीको रूपमा रहेको छ। स्थानीयहरूका अनुसार ‘तोरी’ शब्दकै अपभ्रंस भएर ‘ठोरी’ गाउँपालिकाको नाम रहन गएको विश्वास गरिन्छ।तर यस वर्ष किसानहरूले सुर्ती बालीमा बेमौसमी वर्षाको कारण क्षति व्यहोरेपछि बाध्य भएर तोरी खेतीलाई प्राथमिकता दिएका थिए। किसानहरूको अनुसार गत वर्षको तुलनामा यस वर्ष तोरी उत्पादनमा २५ प्रतिशतले वृद्धि भएको छ।
बेमौसमी वर्षाले तोरी उत्पादनमा फाइदा पुगेको ठोरी गाउँपालिका वडा नं।–५ गडुवालाईनका किसान देवी प्रसाद दहालले बताए। "माटोमा चिसो बसिरहेकाले यस पटक तोरी राम्रो फलेको छ," दहालले भने।उनले कृषिमा आधुनिक उपकरणको प्रयोगले किसानहरूले ४–५ दिनमै थ्रेसरबाट दाइ गरी तोरी भित्र्याउन थालिएको पनि जानकारी दिए।ठोरी गाउँपालिकाको तथ्यांक अनुसार यस वर्ष करिब १ हजार ८ सय बिघा जमिनमा तोरी खेती गरिएको छ। किसान अर्जुन श्रेष्ठका अनुसार प्रति बिघा १५ मुरी अर्थात् साढे ९ क्विन्टल तोरी उत्पादन भएको छ। यस वर्ष ठोरीमा १७५ मेट्रिक टन तोरी उत्पादन हुने अनुमान गरिएको छ।
ठोरी गाउँपालिकाका अधिकांश नागरिक विदेश र अन्य शहरमा रोजगारमा रहेका कारण किसानहरूले तोरी भित्र्याउन ज्यामीको अभाव झेल्नु परेको छ। सीमावर्ती भारतीय गाउँहरू सिस्वा, रामपुर, धुमाटाड, जसौली, थुकहा र जिगना लगायतबाट दैनिक एक हजार ज्यामी कामका लागि आउने गरेका छन्।गत वर्ष तोरीको मूल्य प्रति पाथी तीन सय पचास रूपैयाँ थियो। त्यसको अघिल्लो वर्ष चार सय पचास रूपैयाँ प्रति पाथी रहेको मूल्य यस वर्ष भने बढ्न नसकेको किसानहरूले गुनासो गरेका छन्।तोरी बाली राम्रो उत्पादन भए पनि मूल्य स्थिर रहँदा किसानहरू बजारमा उचित मूल्यको माग गरिरहेका छन्।
