पोखरामा जारी केपी ओली कप टी-ट्वान्टी क्रिकेट प्रतियोगितामा मधेस प्रदेशले पहिलो जित निकालेको छ ।
-
अशोक यादब
- today११ मंसिर २०८०
११ मङ्सिर // अग्निपथ मिडिया
पोखरामा जारी केपी ओली कप टी-ट्वान्टी क्रिकेट प्रतियोगितामा मधेस प्रदेशले पहिलो जित निकालेको छ ।
मधेस प्रदेश समूह चरणको पहिलो खेलमा नेपाल पुलिस क्लबसँग ५७ रनले पराजित भएको थियो ।
सुदूरपश्चिम प्रदेशले दिएको ५९ रनको झिनो लक्ष्य मधेसले ४.४ ओभरमा २ विकेटको क्षतिमा भेट्टायो । मधेसका लागि इमरान शेख १७ र पवन सर्राफ १४ रनमा नटआउट रहे। अनिल साह २५ रनमा क्याच आउट भए । ओपनर तथा कप्तान हरिशकंर शाह शून्य रनमा बोल्ड आउट भए । सुदूरपश्चिमका लागि गजेन्द्र बोहराले २ विकेट लिए ।
त्यसअघि टस जितेर पहिले ब्याटिङ गरेको सुदूरपश्चिम १५.५ ओभरमा ५८ रन बनाउँदा अलआउट भयो ।
सुदूर पश्चिमका लागि नरेन साउदले बनाएको १८ रन नै सर्वाधिक रह्यो। भोजराज भट्ट र किरण ठगुन्नाले समान १० रन बनाए । अन्य ब्याटरले दोहोरो अंकको स्कोर छुन सकेनन् ।
मधेसका लागि हरिशंकर शाहले सर्वाधिक ४ विकेट लिए । उनले आफ्नो स्पेलमा ११ रन दिए । रुपेश साहले ३ विकेट लिए । उनले २.५ ओभरमा १ मेडन राख्दै ७ रन खर्चे । विशाल पटेल, प्रदीप पासवान र विशाल सुश्लिङले समान एक विकेट आफ्नो नाममा गरे ।
समूह ‘सी’ मा पुलिस क्लब र मधेस प्रदेशको समान २ अङ्क छ । सुदूरपश्चिम अङ्क विहीन छ । समूह चरणको अन्तिम खेलमा पुलिस क्लब र मधेस प्रदेश भिड्नेछन् । आजै हुने दोस्रो खेलमा समूह ‘डी’ का त्रिभुवन आर्मी क्लब र मदन भण्डारी स्पोर्टस् एकेडेमी निलो भिड्नेछन् । सो खेल दिउँसो १ बजे सुरु हुनेछ ।
