गढीमाई मेलालाई लक्षित गर्दै विभिन्न पालिकाहरूद्वारा सार्वजनिक बिदा घोषणा
-
बिरेन्द्र यादब
- today१७ मंसिर २०८१
वीरगञ्ज । बाराको गढीमाई मेला प्रारम्भ भएसँगै विभिन्न पालिकाहरूले मेलालाई लक्षित गर्दै बिदा दिने निर्णय गरेका छन् । कलैया उपमहानगरपालिका, महागढीमाई नगरपालिका लगायतका स्थानीय तहले छुट्टाछुट्टै मिति तोकेर बिदा दिने घोषणा गरेका हुन् ।
कलैया उपमहानगरपालिकाका प्रमुख प्रशासकीय अधिकृत नाथु प्रसाद साहका अनुसार उपमहानगरपालिकाले बलिदानका दिन मङ्सिर २३ र २४ गते आइतबार र सोमवार सार्वजनिक बिदा दिने निर्णय गरेको छ ।
यसै गरी, गढीमाई मेला स्थल अवस्थित महागढीमाई नगरपालिकाले मङ्सिर १६ गते सूचना जारी गर्दै मङ्सिर २१ देखि २६ गतेसम्म ६ दिन सार्वजनिक बिदा दिने जनाएको छ । यस अवधिमा नगरपालिकाका वडा कार्यालय, सरकारी कार्यालय, शिक्षण संस्था, वित्तीय संस्था र सङ्घसंस्थाहरू पूर्ण रूपमा बन्द रहनेछन् भने अत्यावश्यक सेवा भने सञ्चालनमा रहनेछन् ।
मेला भर्न भक्तजनहरूको चहलपहल
यस पटकको गढीमाई मेला मङ्सिर १ गतेदेखि सुरु भइसकेको छ भने मुख्य पूजा मङ्सिर १७ गते सोमवारदेखि सुरु हुनेछ । मुख्य पूजाको सुरुआतसँगै मन्दिरमा भक्तजनहरूको भीड बढ्न थालेको छ । पर्सा, बारा र रौतहट लगायत छिमेकी भारतबाट आएका भक्तजनहरू मेला भर्न मन्दिरमा पुग्न थालेका छन् ।
यस पटक मेला स्थलसम्म पुग्ने सडकहरू पक्की भएकाले भक्तजनहरूले आफ्नै सवारी साधन प्रयोग गरी सहज यात्रा गरेका छन्, जसका कारण मन्दिरमा पहिले जस्तो ठूलो भीड कम देखिएको छ । मेलामा विभिन्न मनोरञ्जनका साधनहरू, खाजा पसलहरू, होटेल तथा अन्य पसलहरू सञ्चालनमा आएका छन्, जसले मेलामा थप रौनक थपेको छ ।
गढीमाई मेलाको ऐतिहासिक, धार्मिक र सांस्कृतिक महत्वका कारण यसमा लाखौँ भक्तजनहरू सहभागी हुने अनुमान गरिएको छ । मेलाको व्यवस्थापनमा स्थानीय प्रशासन, सुरक्षा निकाय र स्वयंसेवकहरू सक्रिय रूपमा सहभागी भएका छन् ।
