गोठमा लुकाइएको ६ लाख बराबरको लसुन बरामद
-
अमन गुप्ता
- today५ मंसिर २०८१
वीरगंज | पर्साको बिन्दबासिनी गाउँपालिका–३ झौवा गाउँस्थित जोगिन्द्र यादवको गोठमा लुकाएर राखिएको ६ लाख रुपैयाँ बराबरको लसुन बरामद गरिएको छ।
मंगलबार राति ११ बजे सशस्त्र प्रहरी र नेपाल प्रहरीले संयुक्त रूपमा गरेको अपरेशनमा २,२५० किलो लसुन फेला परेको हो।
सशस्त्र प्रहरी नायव उपरीक्षक सुशिल बस्नेतको कमाण्डमा सिमा सुरक्षा गुल्म, अलौबाट खटिएको १० जनाको टोली र प्रहरी चौकी अमरपट्टीका वरिष्ठ नायव निरीक्षक मदन मल्लको नेतृत्वमा खटिएको १० जनाको टोलीले उक्त लसुन बरामद गरेको हो।
भन्सार छलि गरी चोरी पैठारी गरेर गोठमा ८०/९० बोरामा लुकाएर राखिएको लसुन बरामद गरिएको थियो। अहिले उक्त लसुन भन्सार बुझाउने प्रक्रिया अगाडि बढाउन जिल्ला प्रहरी कार्यालय पर्सामा राखिएको छ।
सशस्त्र प्रहरी र नेपाल प्रहरीको यो संयुक्त कारबाहीले भन्सार छलि रोकथाममा थप योगदान दिने अपेक्षा गरिएको छ।
प्रहरीले गोठबाट लसुन बरामद गरेपछि यस घटनामा संलग्न व्यक्तिहरूको खोजी सुरु गरेको छ। जोगिन्द्र यादवको गोठमा लसुन लुकाएर राखिएको पाइए पनि यस प्रकरणमा अन्य व्यक्ति संलग्न हुनसक्ने आशंका गरिएको छ।
पर्सा जिल्ला भन्सार क्षेत्र नजिकै भएका कारण यस क्षेत्रमा भन्सार छलि र चोरी पैठारीका घटना बारम्बार हुने गरेका छन्। सुरक्षा निकायहरूले सीमा क्षेत्रको निगरानी र नियन्त्रणमा कडाइ गरे पनि यस्ता अवैध गतिविधि रोक्न थप रणनीति आवश्यक रहेको स्थानीयले बताएका छन्।
भन्सार कार्यालयले बरामद लसुनको मूल्यांकन गरी कानूनी प्रक्रिया सुरु गर्ने जानकारी दिएको छ। यस किसिमका घटनामा संलग्न दोषीमाथि कडा कानूनी कारबाही गर्नुपर्ने माग पनि उठ्न थालेको छ।
सशस्त्र प्रहरी नायव उपरीक्षक सुशिल बस्नेतका अनुसार, सीमा क्षेत्रमा सशस्त्र प्रहरी र नेपाल प्रहरीको सहकार्यलाई अझ सुदृढ बनाइने र भविष्यमा यस्ता गैरकानूनी गतिविधि रोक्न कडा कदम चालिने छ।
बरामद लसुनको थप परीक्षण गरी त्यसको वास्तविक मुल्यांकन गरेपछि सरकारी कोषमा दाखिला गर्ने प्रक्रिया पूरा गरिनेछ। यस प्रकारका कारबाहीले स्थानीय क्षेत्रमा सुरक्षाको अनुभूति बढ्ने अपेक्षा गरिएको छ।
