निजगढ प्रहरीले फरार पाँच प्रतिवादी पक्राउ, एक जनाले गर्यो आत्मसमर्पण
-
मो.सगिर अलि
- today५ मंसिर २०८१
वीरगंज | बारा जिल्लाको निजगढमा प्रहरीको सक्रियताले फरार रहेका पाँच प्रतिवादीलाई पक्राउ गरेको छ। इलाका प्रहरी कार्यालय निजगढका प्रहरी निरीक्षक सुमित कुशवाहाको नेतृत्वमा खटिएको टोलीले निजगढ नगरपालिका क्षेत्रका विभिन्न स्थानबाट उनीहरूलाई पक्राउ गरेको हो।
पक्राउ परेका व्यक्तिहरूमा निजगढका खडकराज मैनाली, सागर राई, माया गोले, बालकृष्ण थापा, र इन्दीरा थापा रहेका छन्। यी सबैजनालाई बारा जिल्ला अदालतले विभिन्न मुद्दामा दोषी ठहर गरेको थियो। मैनाली र राईलाई जरिवाना बुझाएर रिहा गरिएको छ भने अन्य तीन जनालाई जिल्ला अदालतमा बुझाइएको छ।
खडकराज मैनालीलाई चेक अनादरको मुद्दामा ५ सय रुपैयाँ जरिवाना र सागर राईलाई सवारी ज्यान मुद्दामा १ महिना कैद र १ हजार रुपैयाँ जरिवाना तोकिएको थियो। माया गोलेलाई लागूऔषध मुद्दामा एक वर्ष कैद र ५ हजार रुपैयाँ जरिवाना तोकिएको थियो। बालकृष्ण थापालाई १ वर्ष ६ महिना कैद र ५ हजार रुपैयाँ जरिवाना र इन्दीरा थापालाई २ हजार रुपैयाँ जरिवाना तोकिएको थियो।
यसबाहेक, एक फरार प्रतिवादी जयप्रकाश सहनीले आत्मसमर्पण गरेका छन्। उनले वन पैदावार हानीनोक्सानी र ओसारपसार मुद्दामा १ वर्षदेखि फरार थिए। सहनीमाथि १ लाख १८ हजार ७५० रुपैयाँ बिगो असुली दाबी गरिएको छ।
निजगढ प्रहरी र डिभिजन वन कार्यालयको प्रयासले फरार प्रतिवादीहरूको पक्राउमा सफलता प्राप्त भएको छ, जसले कानूनको प्रभावकारी कार्यान्वयनमा नागरिकको विश्वास बढाउने अपेक्षा गरिएको छ।
