वीरगञ्जको साह दरबार पार्टी प्यालेस बन्यो तस्कारको गोदाम
-
बिशाल यादब
- today४ मंसिर २०८१
वीरगञ्ज । वीरगञ्जको तेजारथ टोलस्थित साह दरबार पार्टी प्यालेसबाट सशस्त्र प्रहरीले ठूलो मात्रामा काजु र खजुर बरामद गरेको छ ।
सशस्त्र प्रहरी बल नेपाल नम्बर १३ गण पर्सा र वीरगञ्ज भन्सार कार्यालयको सयुँक्त टोलीले साह दरबार पार्टी प्यालेसबाट पाँच लाख ८२ हजार तीन सय रुपैयाँ बराबरको काजु र खजुर बरामद गरेको हो ।
सशस्त्र प्रहरी उपरीक्षक राधेश्याम धिमालका अनुसार अवैध रुपमा गोदाममा भण्डारण गरिएको अवस्थामा अनुगमन गरी काजु र खजुर बरामद गरिएको हो । साह दरबार पार्टी प्यालेस पर्साको बहुदरमाई नगरपालिकाका पूर्व प्रमुख नितेन्द्र साहको हो ।
जनप्रतिनीधि भइसकेको व्यक्तिको गोदामबाट अवैध रुपमा भण्डारण गरिएको सामग्री बरामद हुनुले झनै आशंका उब्जिएको छ । नितेन्द्र साहको लगानी भएपनि उनले सञ्चालन गर्ने जिम्मा भने अरुलाई नै दिएका छन् ।
सशस्त्र प्रहरीले वीरगञ्ज महानगरपालिका वडा नम्बर १० आदर्शनगरबाट पनि अवैध सामग्री बरामद गरेको छ । प्रस्तावित सीमा सुरक्षा गुल्म वीरगञ्जका प्रमुख सशस्त्र प्रहरी नायब उपरीक्षक सुरज रिजाल नेतृत्वको टोलीले आदर्शनगरका राजेन्द्र बरईको घरमा गोदाममा भण्डारण गरी राखिएको कपडा पनि बरामद गरेको छ ।
सशस्त्र प्रहरीसँगै वीरगञ्ज भन्सार कार्यालयका नायब सुब्बा सुवर्ण पौडेलसहितको टोलीले उक्त गोदामबाट ६ लाख १४ हजार चार सय रुपैयाँ बराबरको कपडा बरामद गरेको सशस्त्र प्रहरी उपरीक्षक धिमालले बताए ।
दुबै ठाउँबाट गरेर ११ लाख ९६ हजार सात सय रुपैयाँ बराबरको काजु, खजुर र कपडा नियन्त्रणमा लिइएको धिमालले बताए ।
