पर्साका नाकाबाट ११ लाख ९६ हजार बराबरको सामान बरामद
-
राजु कुशवाहा
- today४ मंसिर २०८१
वीरगंज | पर्साका विभिन्न स्थानमा भन्सार छलि गरी लुकाइछिपाई राखिएको ११ लाख ९६ हजार ७०० बराबरको सामान सशस्त्र प्रहरी बल र वीरगञ्ज भन्सार कार्यालयको संयुक्त टोलीले बरामद गरेको छ।
सशस्त्र प्रहरी बल नं. १३ गण पर्साको विशेष सूचनाका आधारमा सशस्त्र प्रहरी नायव उपरीक्षक सुरज रिजालको नेतृत्वमा खटिएको टोलीले वीरगञ्ज–१० आदर्शनगरस्थित राजेन्द्र बरैको घरबाट ६ लाख १४ हजार ४०० बराबरको कपडा र वीरगञ्ज–१३ तेजारथ टोलस्थित शाह दरबार पार्टी प्यालेसबाट ५ लाख ८२ हजार ३०० बराबरको काजु र खजुर बरामद गरेको हो।
सशस्त्र प्रहरी बल नेपाल १३ नम्बर गणका गणपति सशस्त्र प्रहरी उपरीक्षक राधेश्याम धिमालका अनुसार बरामद सामान आवश्यक कानुनी प्रक्रियाका लागि वीरगञ्ज भन्सार कार्यालयमा बुझाइएको छ। उक्त सामान आज दिउँसो साढे दुई बजे बुझाइएको धिमालले जानकारी दिए।
संयुक्त टोलीमा सशस्त्र प्रहरीको टोलीसँगै भन्सार कार्यालयका नायब सुब्बा सुवर्ण पौडेलसहित तीन जनाको सहभागिता थियो। बरामद गरिएको सामान भन्सार प्रक्रिया बिना लुकाएर भण्डारण गरिएको पाइएको छ।
यसअघि पनि सशस्त्र प्रहरी बलले पर्साका विभिन्न नाकाबाट भन्सार छलिको सामान बरामद गर्दै आएको छ।
यसले भन्सार छलि र गैरकानुनी व्यापार नियन्त्रणमा सशस्त्र प्रहरीको सक्रियता र भूमिकालाई पुनः पुष्टि गरेको छ। सीमावर्ती क्षेत्रबाट अवैध रूपमा भित्र्याइने वस्तुहरूले देशको आर्थिक प्रणालीमा नकारात्मक प्रभाव पार्ने भएकाले यस प्रकारको निगरानी र कारबाहीलाई अझ प्रभावकारी बनाउनुपर्ने आवाज उठ्दै आएको छ।
सशस्त्र प्रहरी बल र भन्सार कार्यालयको संयुक्त पहलले सीमाक्षेत्रको सुरक्षा र अवैध कारोबारको रोकथाममा थप मद्दत पुग्ने विश्वास गरिएको छ। सीमावर्ती क्षेत्रमा लुकाइछिपाई सामान ओसारपसार गर्न सक्रिय समूहहरूको पहिचान गरी आवश्यक कानुनी कारबाही अघि बढाउन पनि सुरक्षा संयन्त्रले विशेष ध्यान दिनुपर्ने देखिन्छ।
यो कारबाहीले पर्सा जिल्लामा भन्सार छलि तथा गैरकानुनी भण्डारणका गतिविधिहरू अझ कडा निगरानीमा राख्न सघाउ पुर्याउने अनुमान गरिएको छ। सुरक्षा निकायले यस्ता कारबाहीलाई नियमित रूपमा अगाडि बढाए भन्सार नीतिमा पारदर्शिता र राजस्व वृद्धिमा टेवा पुग्ने अपेक्षा गरिएको छ।
