सप्तरीमा १७ क्विन्टल गाँजासहित एक जना पक्राउ
-
अशोक यादब
- today०४ मंसिर २०८१
वीरगंज | सप्तरीको राजगढ गाउँपालिका–४ बाट १७ क्विन्टल ३६ किला गाँजासहित एक व्यक्तिलाई प्रहरीले पक्राउ गरेको छ। बालुवा र गिटीले छोपेर गाँजा लोड गरिएको टिपर सोमबार राति राजगढ गाउँपालिका–४ बेल्ही चपेना शनि मन्दिरनजिक भित्री सडक खण्डमा नियन्त्रणमा लिइएको हो।
कल्याणपुरस्थित इलाका प्रहरी कार्यालयका अनुसार, टिपरको निरीक्षण गर्दा ५६ बोराभित्र लुकाइएको गाँजा फेला परेको छ। सो टिपरका चालक धनकुटाको सहिदभूमि गाउँपालिका–३ निवासी ३३ वर्षीय यमजित राईलाई पक्राउ गरिएको छ।
पक्राउ परेका राईलाई आज अदालतमा पेस गरिने प्रहरीको भनाइ छ। उनलाई हिरासतमा राखेर अनुसन्धान तथा कानुनी प्रक्रिया अघि बढाउन अदालतसँग अनुमति लिने तयारी भइरहेको छ।
प्रहरीले गोप्य सूचनाका आधारमा सो टिपरलाई जाँच गरेको थियो। प्रारम्भिक अनुसन्धानअनुसार, गाँजा तस्करीको लागि बालुवा र गिटीले ढाकेर गाडीलाई भारततर्फ लैजाने योजना बनाइएको थियो।
यस घटनाले लागूऔषध तस्करीको जालो र यसको नियन्त्रणका लागि आवश्यक निगरानी र कानुनी कदमको आवश्यकता पुनः उठान गरेको छ। स्थानीय प्रहरीले यस सम्बन्धमा थप अनुसन्धान जारी राखेको जनाएको छ।
