वीरगञ्जमा (Spa-centre) स्पा-सेन्टरको नाममा समाजलाई पतनतिर धकेल्ने खुला खेलः को छन् यसको पछाडि?
-
बिराज यादव
- today३० कार्तिक २०८१
वीरगञ्जमा स्पा सेन्टरको नाममा समाजलाई पतनतिर धकेल्ने खुला खेलः को छन् यसको पछाडि?
कटेज रेस्टुरेन्टको विकृति पुनः फर्कियो स्पा सेन्टरको नाममा, प्रशासन किन मौन?
बीरगञ्ज – वीरगञ्जमा केही वर्षअघि खुलेका कटेज रेस्टुरेन्ट एण्ड बारले समाजमा विकृति र अपराधको बीजारोपण गरेको घटना भर्खरै ताजा छ। यसले खुलेआम यौन व्यापारदेखि लिएर लुटपाटसम्मका गतिविधिलाई प्रोत्साहन गरेको थियो। यसप्रति जनता र प्रशासनले आक्रोश पोख्दै यसलाई अन्त्य गरे, तर आश्चर्य! आज उही विकृति ‘स्पा सेन्टर’ को नाममा पुनः फर्किएको छ। बीरगञ्जको आर्थिक र सांस्कृतिक प्रगतिलाई यसरी दुर्गन्धित बनाउन किन अनुमति दिइएको हो?
स्पा सेन्टरका नाममा खुलेका यी स्थानमा खुलेआम अवैध गतिविधि भइरहेका छन् भन्ने कुरा खुलेआम चर्चा छ। एकातिर विद्यालय र कलेज खोल्न जनताले अनेकौं मापदण्ड पुर्याउनु पर्ने र प्रशासकलाई नजराना बुझाउनु पर्ने बाध्यता छ, तर समाजमा विकृति फैलाउने यस्ता स्पा सेन्टर सजिलै कसरी खोल्न दिइएको? के यस्ता अनैतिक कार्यलाई प्रोत्साहन दिन कसैको मिलोमतो छ?
बीरगञ्जको गरिमा र अनुशासनलाई असर पुर्याउँदै, यो सहरलाई काठमाडौँ र पोखराको जस्तै बिकृतिको केन्द्र बनाउने उद्देश्यले यी स्पा सेन्टरहरू खुल्न दिइएको हो? यो प्रश्नले समाजमा ठूलो सन्देह र चिन्ता उत्पन्न गराएको छ।
दिन प्रतिदिन यी स्पा सेन्टरहरूको संख्या बढिरहेको छ। बिना कुनै रोकटोक र परिबन्ध, यसरी विकृतिका केन्द्रहरू खोल्न दिनेहरूको वास्तविक उद्देश्य के हो? जनप्रतिनिधि, प्रशासन र नेताको यो चुप्पीले जनताको मनमा शंका पैदा गरेको छ। के यो सबैको फाइदा केवल नेतृत्व र प्रशासनलाई मात्र छ, न कि जनतालाई?
वीरगञ्जवासीहरूलाई यो चेतावनीः यदि अहिले नै यसप्रति सजगता अपनाइएन भने, यो समाज चाँडै नै विकृति र अपराधको भासमा पर्छ। बीरगञ्जका जनप्रतिनिधिहरूले किन यस्ता विकृति फैलाउन मार्ग प्रशस्त गर्दैछन्? जनताले यसबारे प्रश्न नगरेकोमा नेतृत्व किन मौन छ?
बीरगञ्जको भविष्यका लागि यो समयमै रोकिनुपर्ने खतरा हो। प्रशासन, जनप्रतिनिधि र जनताले एकजुट भएर यस्ता गतिविधिलाई नियन्त्रण गर्न नखोजे, समाजमा थप संकट आउन सक्छ। सम्बन्धित सबैले यसप्रति गम्भीर चासो राख्नुपर्छ, नत्र बीरगञ्जलाई यस्ता विकृति र पतनले भोलि अझै ठूलो भड्खालोमा धकेल्न सक्छ।
