पर्सामा छड्के निरीक्षण, ३२ सरकारी कर्मचारी अनुपस्थित
-
बिशाल यादब
- today२७ कार्तिक २०८१
वीरगञ्ज । पर्सा जिल्लाका सेवाग्राहीको अत्यधिक चाप हुने सरकारी कार्यालयहरूमा कर्मचारी अनुपस्थित रहेको पाइएको छ। जिल्ला प्रशासन कार्यालय पर्साले गरेको छड्के निरीक्षणमा ६ कार्यालयमा ३२ जना कर्मचारी अनुपस्थित भेटिएका छन्।
प्रमुख जिल्ला अधिकारी गणेश अर्यालका अनुसार सेवाग्राहीको चाप बढिरहेको र कार्यालय प्रमुख तथा कर्मचारीहरू नियमित रूपमा उपस्थित नरहेको जनगुनासो आएपछि अनुगमन टोली खटाइएको हो। उनले केही कार्यालयमा लामो समयदेखि हाजिरी नगर्ने तर विदामा बस्नेसम्म नगरेका कर्मचारीसमेत फेला परेको बताए।
अनुगमनपछि अधिकारी अर्यालले सम्बन्धित प्रादेशिक मन्त्रालयलाई जानकारी दिइ, गयल भएका कार्यालय प्रमुखहरूलाई स्पष्टिकरण सोध्ने र अन्य अनुपस्थित कर्मचारीहरूमाथि कारबाहीका लागि निर्देशन दिने बताए। उनले जनसम्पर्क बढी भएका कार्यालयहरूको नियमित निरीक्षण गरेर अनुपस्थित हुने र पोशाक नलगाउने कर्मचारीहरूलाई कारबाही सिफारिस गरिने जनाए।
निरीक्षण टोलीमा सहायक प्रमुख जिल्ला अधिकारी निशान राज गौतम र सुमन कुमार कार्की सहभागी थिए। टोलीले भूमिसुधार तथा मालपोत कार्यालय, यातायात व्यवस्था कार्यालय, सघन सहरी तथा भवन निर्माण कार्यालय, नेपाल विद्युत प्राधिकरण वीरगञ्ज वितरण केन्द्र, स्वास्थ्य कार्यालय र डिभिजन वन कार्यालयको अनुगमन गरेको थियो।
निरीक्षणमा यातायात व्यवस्था कार्यालय पर्सामा ११ जना कर्मचारी अनुपस्थित फेला परे। भूमिसुधार तथा मालपोत कार्यालयमा २१ जना कर्मचारी निर्धारित समयभन्दा ढिलो आएका थिए भने सोमबारको निरीक्षणमा ४ जना विदामा र ३ जना बिना जानकारी अनुपस्थित थिए।
प्राधिकरणको वीरगञ्ज वितरण केन्द्रमा ई–हाजिरी प्रणाली लागू भए पनि निरीक्षण टोलीलाई हाजिरीको विवरण उपलब्ध नगराइएकाले सबै कर्मचारीको उपस्थिति विवरण प्राप्त हुन सकेन।
जिल्ला प्रशासन कार्यालयका खरिदार कृष्ण प्रसाद कुशवाहाले ढिलो आउने कर्मचारीलाई समयपालन चेतावनी दिइ पुनः ढिलाइ गर्दा कारबाही गरिने चेतावनी दिएका छन्।
