वीरगञ्जमा बढी भाडा असुल्ने तीन जना पक्राउ, यात्रु राहतको अपेक्षा
-
मेराज हास्मी
- today२६ कार्तिक २०८१
वीरगञ्ज। यात्रुहरूसँग अनुचित रूपमा बढी भाडा असुल गर्ने आरोपमा पर्सा प्रहरीले तीन जनालाई नियन्त्रणमा लिएको छ। लामो दूरीका सवारीसाधनहरूले यात्रुहरूमाथि अनावश्यक आर्थिक भार थपेको गुनासो आएपछि प्रहरीले विशेष ‘सर्च’ अभियान चलाएर उनीहरूलाई पक्राउ गरेको हो।
पर्सा प्रहरी प्रमुख कुमोध ढुंगेलका अनुसार यात्रुहरूबाट गैरकानूनी रूपमा बढी भाडा लिएको गुनासो बढ्दै गएपछि वीरगञ्ज बसपार्क क्षेत्रलाई विशेष निगरानीमा राखेर प्रहरी टोली परिचालन गरिएको थियो। यस अभियानकै क्रममा तीन जना पक्राउ परेका हुन्, जसले यात्रुहरूसँग अन्यायपूर्ण तरिकाले भाडा असुल्दै आएका थिए।
प्रहरीले पक्राउ परेकाहरूको नाम खुलाएको छैन। उनीहरूलाई थप अनुसन्धानका लागि जिल्ला प्रहरी कार्यालय पर्सामा राखिएको छ। प्रहरीले भाडा असुलीमा भएको मनोमानीलाई कडाइका साथ नियन्त्रण गर्ने र यात्रुहरूलाई उचित भाडा सेवा उपलब्ध गराउने प्रतिबद्धता जनाएको छ।
यो घटनाले यात्रुहरूलाई बढी भाडाबाट राहत दिने आशा गरेको छ भने, यात्रुहरूले पनि भाडा असुलीमा देखिएको दुरुपयोग रोक्न प्रहरीको सक्रियतामा विश्वास व्यक्त गरेका छन्।
