जितपुरसिमरामा दुधौरा खोलाबाट नदीजन्य पदार्थ तस्करी, प्रहरी र स्थानीय सरकार मौन
-
बिशाल यादब
- today२० कार्तिक २०८१
बारा । बारा जिल्लाको जितपुरसिमरा उपमहानगरपालिका–८ अन्तर्गत पर्ने दुधौरा खोलामा अवैध रुपमा बालुवा र गिटीको तस्करी भइरहेको स्थानीयबासीले गम्भीर आरोप लगाएका छन्। उनीहरूका अनुसार, स्थानीय जनप्रतिनिधि र प्रहरी प्रशासनको मिलेमतोमा नै तस्करी भइरहेको छ।
तस्करी खुलेआम चलिरहँदा प्रहरी प्रशासन र स्थानीय सरकारको मौनताले जनप्रतिनिधि र प्रशासनको संलग्नतामाथि गम्भीर आशंका उत्पन्न भएको छ। स्थानीयहरूका अनुसार, दुधौरा खोलामा हालसम्म नदीजन्य पदार्थको ठेक्का प्रक्रिया सम्पन्न भएको छैन, तर अवैध रुपमा गिटी, बालुवा निकालेर व्यापार भइरहेको छ।
स्थानीयहरूले तस्करीको विरोधमा पत्रकार र प्रहरीलाई खबर गरेपछि केही दिनअघि प्रहरीले केही गाडी नियन्त्रणमा लिएको थियो। तर, यसपछि पनि तस्करी रोकिनुको सट्टा निरन्तर भइरहेको देखिएको छ। आज बिहान पनि दुधौरा खोलामा ट्याक्टरमा ढुङ्गा र बालुवा लोड भइरहेको दृश्य स्थानीयहरूले फेला पारेका छन्।
प्रहरी प्रशासन र जनप्रतिनिधिहरूले यस विषयमा तत्काल कदम चाल्नुपर्ने माग स्थानीयहरूको छ। तस्करी रोक्न शीघ्र कारबाहीको माग गर्दै उनीहरूले सुरक्षा निकायलाई आवश्यक कदम चाल्न दबाब दिएका छन्।
