चाडवाडमा वीरगञ्जका क्यासिनोले प्रलोभनमा पारेर नेपाली नागरिकलाई जुवा खेलाउँदै
-
मेराज हास्मी
- today२० कार्तिक २०८१
वीरगंज | चाडवाडमा वीरगञ्जका क्यासिनोले प्रलोभनमा पारेर नेपाली नागरिकलाई जुवा खेलाउँदै वीरगञ्ज । चाडवाडको अवसरमा वीरगञ्जमा सञ्चालित विभिन्न क्यासिनोहरूले नेपाली नागरिकलाई प्रलोभन देखाउँदै जुवा खेल्न प्रेरित गरिरहेको खुलासा भएको छ । नेपाली नागरिकलाई क्यासिनो प्रवेशमा कानुनले नै स्पष्ट रुपमा रोक लगाए पनि, केही क्यासिनोहरूले विशेष छुट र आकर्षक उपहारको घोषणा गर्दै नेपाली नागरिकलाई जुवाको जालमा पारिरहेको पाइएको हो ।
यात्रा डेलीलाई प्राप्त जानकारी अनुसार क्यासिनोहरूले कुपन प्रणालीमार्फत मोटरसाइकल, कारजस्ता महंगा उपहार जित्न सकिने योजना ल्याएका छन् । केही ग्राहकहरूले क्यासिनोको यस प्रलोभनका कारण जुवा खेल्न जाने गरेको बताउँछन् । चाडवाडको रमाइलोमा सहभागी हुने बहानामा थुप्रै नेपाली नागरिकलाई यो जुवाको लतमा फसाउने काम भइरहेको स्थानीय स्रोतहरूले बताए ।
वीरगञ्जमा क्लार्क रिसोर्ट, लड्र्स दियालोको किङ्गस कलेक्सन प्रा. लि., सुरज होटल र सेन्ट्रल मिडिया ग्रुपद्वारा सञ्चालित ह्याप्पी आवर क्यासिनोले नेपाली नागरिकलाई आकर्षित गर्ने योजनाहरु ल्याउँदै आएका छन् । यस प्रकारका योजना नेपाली कानुन विपरित भएको हुँदा पनि स्थानीय प्रशासनको उदासीनता तथा नियमनको अभावका कारण क्यासिनो सञ्चालकले अझ बढी हौसला पाएको देखिन्छ ।
यसबारे जिल्ला प्रशासन कार्यालय पर्साका प्रमुख जिल्ला अधिकारी गणेश अर्यालले पनि गम्भीरता व्यक्त गरेका छन् । यात्रा डेलीसँगको कुराकानीमा प्रमुख जिल्ला अधिकारी अर्यालले यस विषयमा प्रहरी प्रशासनसँग समन्वय गरी तुरुन्तै अनुगमन गर्ने प्रतिबद्धता जनाए । क्यासिनोहरूले नेपाली नागरिकलाई आकर्षित गराएर खेलाउनु गैरकानुनी गतिविधि भएको बताउँदै उनले कडाइका साथ कारबाही गरिने चेतावनी दिए ।
यता जिल्ला प्रहरी कार्यालय पर्साका प्रमुख प्रहरी उपरीक्षक कुमोद ढुङ्गेलले पनि गैरकानुनी गतिविधि गर्ने जोकोही पनि कानुनी कारवाहीको भागेदार बन्नुपर्ने बताए । हल्ला सुनिएपनि प्रहरी तथ्य र प्रमाणको भरमा अघि बढ्ने बताउँदै उनले यस विषयलाई गम्भिरतापूर्वक लिएको बताए ।
स्थानीय जनताको चासो पनि यसै विषयमा केन्द्रित भएको छ । सामाजिक अभियन्ता तथा नागरिक अधिकारकर्मीहरूले प्रशासनलाई चाँडो कदम चाल्न आग्रह गरेका छन् । क्यासिनोहरूले आफ्नो आर्थिक लाभका लागि नियमको खिल्ली उडाइरहेको र यसले समाजमा नकारात्मक प्रभाव पार्ने भन्दै उनीहरूले कडाइका साथ नियम पालन गर्न माग गरेका छन् ।
