धनुषाको जुवाखालमा एसपी तिवारीको छापामारी: ३९ जुवाडे पक्राउ, १० लाख नगद बरामद
-
बिशाल यादब
- today१९ कार्तिक २०८१
वीरगंज | धनुषा जिल्लाको क्षिरेश्वरनाथ नगरपालिका वडा नम्बर ६ सखुवा बजारस्थित धर्मशालामा जुवा खेलिरहेका ३९ जनालाई धनुषा प्रहरीले छापामारी गरी पक्राउ गरेको छ। धनुषाका प्रहरी प्रमुख एसपी भुवनेश्वर तिवारीको निर्देशनमा शनिबार राति १ बजे गरिएको यस कारबाहीमा जुवाडेहरू नियन्त्रणमा लिइएका हुन्। पक्राउ परेका जुवाडेहरूमा धनुषासहित उदयपुर र रौतहट जिल्लाका व्यक्तिहरू पनि छन्।
प्रहरीको छापामारीमा जुवाखालबाट ९ लाख ७३ हजार ८ सय ७३ रुपैयाँ नगद बरामद भएको छ। साथै, तासका दुई गड्डी, फलवार प्रिन्ट भएको तीन थान तास, २४ पिस कौडा, ३६ थान मोबाइलसमेत बरामद गरिएको छ। जुवाखालमा जुवा खेलाउने मुख्य अभियुक्त किसोरी साह रहेका छन्, जसलाई यसअघि पनि जुवा खेलाउने आरोपमा पक्राउ गरिएको थियो।
धर्मशालाको पहिलो तलामा नियमित रूपमा जुवा खेलाउने गरेको र त्यसमा धर्मशाला सञ्चालकहरूले पनि कमिसन लिने गरेको खुलेको छ। इलाका प्रहरी कार्यालय सखुवा महेन्द्रनगरका इन्सपेक्टर सोनी साहको संरक्षणमा निरन्तर रूपमा जुवा खेलाइँदै आएको स्रोतले जनाएको छ। साहले जुवा खेल्नका लागि हरेक दिन ८० हजार रुपैयाँ लिने गरेको आरोप छ।
पक्राउ परेका अन्य व्यक्तिहरूमा रौतहटका जबिरा शाह, उदयपुरका रामरतन कापड, धनुषाका वंशराज नदाफ, बिलटु राइन मिया लगायत छन्। विशेष सुराकीका आधारमा एसपी तिवारीले स्वयं छापामारी गरेका हुन्, जसको जानकारी इन्सपेक्टर साहलाई समेत थिएन।
धनुषामा यसरी ठूलो संख्यामा जुवाडेहरू पहिलो पटक पक्राउ परेका हुन्। पक्राउ परेकाहरूविरुद्ध मुद्दा चलाइने तयारी गरिएको छ। साथै, इन्सपेक्टर साहले आफ्नो इलाकामा महिला सहितको आर्केष्ट्र नचाउन अनुमति दिएको आरोपसमेत लागेको छ, जुन जिल्ला प्रहरी कार्यालयले रोक लगाएको गतिविधि हो।
