दीपावली तथा छठ पर्वलाई लक्षित गर्दै वीरगञ्जमा माटाका भाँडाकुँडाको व्यापार शुरू
-
बिशाल यादब
- today१३ कार्तिक २०८१
वीरगञ्ज । दीपावली तथा छठ पर्व नजिकिंदै जाँदा वीरगञ्ज को बिपी उद्यानको पूर्वी पर्खाल छेउमा माटाका भाँडाकुँडाको व्यापार शुरु भएको छ। पर्सा जिल्लाका करीब दुई दर्जन कुम्हाल समुदायका व्यापारीले गाउँबाट ठूलो परिमाणमा माटाका परम्परागत सामग्री बिक्रीका लागि ल्याएका छन्।
कुम्हाल व्यापारीहरूले माटाका दियो, ढकना, कलश, चौमुख, हात्ती लगायतका सामग्रीको व्यापार गर्दैछन्। तर, कृत्रिम झालरबत्तीको प्रयोग बढ्दै गएपछि माटाका दियोको माग विगतका वर्षभन्दा घटेको उनीहरूको गुनासो छ। पकाहामैनपुर गाउँपालिका–२ सुर्जाहाका भागीरथ पडितका अनुसार, दियोको कम बिक्रीले आफ्नो परम्परागत पेशा नै धरापमा परेको छ।
बजारभाउ स्थिर, कारोबारमा कमी
यद्यपि, माटाका यी सामग्रीहरूको मूल्य पोहोरकै जस्तै रहे पनि कारोबार भने घट्दै गएको व्यापारीहरूले बताए। भागीरथ पडितले हाल १ सयकडा दियोको मूल्य रु १२०–१३०, ढकना रु ४०, कलश रु ६०–८०, चौमुख रु १०, हात्ती रु २४०–६००, तथा धूपदानी रु ४० मा बिक्री भइरहेको जानकारी दिए।
बजारमा झालरबत्तीको माग उच्च हुँदा दीपावलीका लागि माटाका दियोको प्रयोग घटिरहेको भए पनि छठ पूजाका लागि भने माटाका सामग्रीहरूको माग कायमै रहेको उनीहरूको भनाइ छ।
छठ पूजामा माटाका सामग्रीहरूको प्रमुखता
कुम्हाल व्यापारीहरूका अनुसार, छठ पूजामा माटोबाट बनेका सामग्रीहरूको विकल्प नभएका कारण त्यस बेला केही बिक्री बढ्छ। विशेष गरी माटाका दियो, ढकना, हात्ती, घैला, र कलश छठ पर्वका लागि बढी बिक्री हुने गर्छन्।
बिपी उद्यानको फूटपाथमा दीपावली तथा छठ पर्वसम्म माटाका यी परम्परागत सामग्रीहरूको बिक्री वितरण गर्न थालिएको छ, जसले केही हदसम्म व्यापारमा सकारात्मक प्रभाव पारेको छ।
