छोरी शिक्षाबाट बालविवाह रोक्न सकिन्छ: मुख्यमन्त्री सिंह
-
बलिराम श्रीवास्तव
- today१ फाल्गुन २०८१
जनकपुरधाम । मधेश प्रदेशका मुख्यमन्त्री सतिशकुमार सिंहले गरीबीको रेखामुनि रहेका बहुसंख्यक परिवारहरूले छोरीको विवाह गरेर आर्थिक बोझ घटाउने सोच राख्दा बालविवाहको प्रचलन बढिरहेको बताएका छन्। उनकाअनुसार, छोरी शिक्षामा संलग्नता अभावका कारण यस्तो समस्या उत्पन्न भएको हो र शिक्षा तथा जनचेतनाले मात्र यसलाई अन्त्य गर्न सकिन्छ।
मुख्यमन्त्री निवास, मधेश भवन, जनकपुरधाममा आयोजित कार्यक्रममा बालबालिकाको अधिकार र सुरक्षाका लागि कार्यरत जस्ट राइट्स फर चिल्ड्रेन इन नेपाल तथा बेस नेपालका प्रतिनिधिहरूले पनि आफ्नो मत राखे। उनीहरुले बालिकाको शैक्षिक उपलब्धि र विभिन्न पेशागत क्षेत्रमा प्रदर्शन गरेको सफलतालाई सकारात्मक उन्नतिको संकेतका रूपमा प्रस्तुत गरे।
सतिशकुमार सिंहले भने, “गरिबीका कारण केही अभिभावकहरूले छोरीको पूर्ण शिक्षा बिना नै विवाह गर्ने मानसिकता अपनाएका छन् जसले बालविवाहलाई प्रश्रय दिएको छ। बालिकाको शिक्षाले मात्र होइन, घरपरिवारभित्र र समुदायमा पनि सकारात्मक सोचको विकास गर्न जरुरी छ। हामीलाई थाहा छ कि शिक्षित छोरीले सामाजिक, आर्थिक र पेशागत क्षेत्रमा उत्कृष्टता हासिल गरी राष्ट्र निर्माणमा महत्वपूर्ण योगदान पुर्याउन सक्छिन्।”
उनले अभिभावकहरूलाई आग्रह गरे कि, छोरीलाई बाल्यकालदेखि नै शिक्षा प्राप्त गराउने र विवाहका लागि कानुनी उमेर पुगेपछि मात्र विवाह गर्ने प्रचलनलाई अँगाल्नुपर्ने हो। साथै, गैरसरकारी संस्था र दातृ निनकायहरूलाई समेत सचेतना अभियानमा थप सक्रिय भई छोरी शिक्षा र बालविवाह रोकथामका लागि हातेमालो गर्न प्रोत्साहित गरे।
मधेश प्रदेशमा सरकारी सेवामा ५० प्रतिशत महिला आरक्षण रहेको र यसले छोरीलाई प्रतिस्पर्धात्मक अवसरहरू प्रदान गरेको अवस्थालाई मुख्यमन्त्रीले उल्लेखनीय ठाने। उहाँले बालविवाहलाई सामाजिक समस्या र कानुनी अपराधको रूपमा हेर्ने प्रतिबद्धतापत्रमा पनि हस्ताक्षर गर्दै, यसका विरुद्धको सङ्घर्षलाई थप प्रगाढ बनाउने सुनिश्चितता दिएका छन्।
