पर्सामा वन विनाश तीव्र, कर्मचारी र तस्करको मिलेमतोको आरोप
-
बिरेन्द्र यादब
- today१६ मंसिर २०८१
वीरगञ्ज। पर्सामा वन विनाश तीव्र गतिमा भइरहेको र यसका कारण जनप्रतिनिधिहरूले गम्भीर चिन्ता व्यक्त गरेका छन्। उनीहरूको अनुसार, सबडिभिजन वन कार्यालय, पर्सामा कार्यरत कर्मचारीहरूको दोहोरो नीतिका कारण वन फँडानी र तस्करी मौलाएको छ।
जनप्रतिनिधिहरूका अनुसार, वन कार्यालयका केही कर्मचारीहरूले कम परिमाणको काठ पक्राउ गरी प्रचार प्रसार गर्ने तर राति ठूलो मात्रामा सालका रूखहरू कटान गरी तस्करी गराउने गरेको आरोप लागेको छ।
पर्साको राष्ट्रिय वन क्षेत्र वरपर ठूलो सङ्ख्यामा वैध र अवैध चिरान मिल तथा फर्निचर उद्योगहरू सञ्चालनमा छन्। यस्ता उद्योगहरूसँग डिभिजन वन कार्यालय र साझेदारी वन उपभोक्ता समितिबाट काठ बिक्री गरिएको प्रमाण नभए पनि पुराना बिलका आधारमा नयाँ काठको कारोबार भइरहेको छ। छापामारी हुँदा पुराना बिल देखाएर कानुनी कारबाहीबाट बच्ने प्रवृत्ति देखा परेको छ।
वन क्षेत्र खाली गराउँदै अतिक्रमणको तयारी पनि सुनियोजित रूपमा भइरहेको छ। राष्ट्रिय वनका रूख काटेर खाली बनाइने क्षेत्रहरूमा अतिक्रमणको योजना लागू गरिएको आरोप छ। यद्यपि, प्रदेश सरकारले काठ चोरी, शिकारी र अतिक्रमण रोक्न बजेट विनियोजन गरेको भएता पनि सो रकम उद्देश्यअनुसार खर्च नहुने र नक्कली बिलमार्फत दुरुपयोग भइरहेको आरोप छ।
पर्सागढी नगरपालिका-३ जोकर खोला हुँदै तस्करी गरिरहेको एक ट्याक्टर नियन्त्रणमा लिएको थियो। तर, वन कार्यालयका कर्मचारीहरूले आर्थिक चलखेल गरेर ट्याक्टर र चालकलाई साधारण टिप्पणीमार्फत छोड्न लागेको आरोप छ।
स्थानीय जनप्रतिनिधिहरूले वन फँडानी र तस्करी नियन्त्रणका लागि वन कार्यालयका कर्मचारी र उद्योगहरूमा कडा निगरानी र पारदर्शिता माग गरेका छन्।
