गृहमन्त्री लेखकले गरे हैजा सङ्क्रमित बिरामीहरूसँग भेटघाट
-
मेराज हास्मी
- today१५ भदौ २०८२
वीरगन्ज । गृहमन्त्री रमेश लेखकले पर्सा जिल्लामा फैलिएको हैजा महामारीको चपेटामा परेका बिरामीहरूसँग आज भेटघाट गरेका छन् । शनिबार वीरगन्ज पुगे लगत्तै नारायणी अस्पतालको निरीक्षण गरेका गृहमन्त्री लेखकले आज बिहान निजी अस्पताल पुगेर बिरामीलाई भेटेका हुन ।
जिल्लाको वीरगन्ज हेल्थ केयर र तराई अस्पतालमा उपचाररत रहेका हैजा सङ्क्रमित बिरामीहरूसँग उनी भेटघाट गरेका छन् । त्यसक्रममा उनले बिरामीहरूको स्वास्थ्य अवस्थाबारे जानकारी लिएका छन् । भेटघाटका क्रममा गृहमन्त्री लेखकले सरकारले हैजा नियन्त्रणका लागि सबै उपायहरू अवलम्बन गरिने बताए ।
गृहमन्त्रीसँगै कानुन मन्त्री अजयकुमार चौरसिया पनि अस्पताल पुगेका थिए । पर्सामा १५९ जनामा हैजा पुष्टि भइसकेको जिल्ला जनस्वास्थ्य कार्यालयले जनाएको छ । जसमध्ये ११२ जना निको भएर घर फर्किसकेको जनस्वास्थ्य कार्यालयका अधिकृत जयमोद ठाकुरले बताए ।
उनका अनुसार अहिले वीरगन्जका विभिन्न अस्पतालमा ४७ जना हैजा सङ्क्रमित बिरामीहरू उपचाररत रहेका छन् ।
