वीरगञ्जमा पाँच वर्षमुनिका बालबालिकालाई स्वर्ण बिन्दु खोप खुवाइँदै
-
बिशाल यादब
- today६ मंसिर २०८१
वीरगञ्ज। प्रादेशिक आयुर्वेदिक तथा वैकल्पिक चिकित्सालय वीरगञ्जले आज पाँच वर्षमुनिका बालबालिकालाई स्वर्ण बिन्दु खोप खुवाइँदै छ। यो कार्यक्रम बालबालिकाको शारीरिक र मानसिक विकासलाई प्रोत्साहन दिने उद्देश्यले सञ्चालन गरिएको हो, जसले बालबालिकाको प्रतिरक्षा प्रणालीलाई बलियो बनाउन मद्दत पुर्याउँछ।
चिकित्सालयले प्रत्येक महिनाको निश्चित मितिमा स्वर्ण बिन्दु खोप कार्यक्रम सञ्चालन गर्दै आएको छ। चिकित्सालयका प्रमुख डा. शिवनारायण गुप्ताका अनुसार, स्वर्ण बिन्दु खोप बालबालिकाको मस्तिष्कको विकासमा महत्त्वपूर्ण भूमिका खेल्दछ र यसले उनीहरूको स्वास्थ्यलाई समृद्ध बनाउन सहयोग पुर्याउँछ। डा. गुप्ताले विशेष गरी पाँच वर्ष मुनिका बालबालिका शारीरिक र मानसिक विकासको संवेदनशील चरणमा रहेको हुँदा यो खोप अत्यावश्यक रहेको बताए।
स्वर्ण बिन्दु खोपले निमोनिया, झाडापखालाजस्ता रोगबाट बचाउन मद्दत गर्ने र बालबालिकाको तौल वृद्धिमा पनि सहयोग पुर्याउने डा. गुप्ताले जानकारी दिए। चालु वर्षमा साउन २०, भदौ १५, असोज ११ र कात्तिक ८ मा खोप खुवाइएको थियो। आज मङ्सिर ६ गते पनि खोप खुवाइँदैछ।
यस कार्यक्रमको निरन्तरता दिनका लागि आगामी महिनामा पुस ३, माघ २, फागुन २६, वैशाख २१, जेठ १८ र असार ११ मा पनि स्वर्ण बिन्दु खुवाउने योजना रहेको चिकित्सालयले जनाएको छ।
चिकित्सालयले अभिभावकहरूलाई आह्वान गर्दै बालबालिकाका लागि यस कार्यक्रमको सक्रिय सहभागीता जनाउन आग्रह गरेको छ।
