बिरगञ्जमा शिक्षा र खेलकुदको शक्तिशाली संगम—सूर्योदय स्कुलको कार्यक्रमले दियो राष्ट्र निर्माणको सन्देश
-
संजय कुशवाहा
- today१६ चैत्र २०८२
बिरगञ्जस्थित सूर्योदय इङ्लिस बोर्डिङ स्कुलले आफ्नो वार्षिक खेलकुद प्रतियोगिताको पुरस्कार वितरण कार्यक्रम भव्य र भावनात्मक वातावरणमा सम्पन्न गरेको छ। कार्यक्रम प्याप्सन बीरगञ्ज का नगर अध्यक्ष राहुल श्रीवास्तव को प्रमुख आतिथ्यमा सम्पन्न भएको थियो। कार्यक्रममा स्टार युरो किड्सका सानु राणा, समाजसेवी सम्झना गुरुङ, A News टेलिभिजन का राज सराफ, अग्निपथ मिडिया का चेयरपर्सन सञ्जय कुशवाहा, तथा ज्योति मिडिया का कन्हैया पटेल लगायतको गरिमामय उपस्थिति रहेको थियो। कार्यक्रममा उत्कृष्ट प्रदर्शन गर्ने विद्यार्थीहरूलाई मेडल, पुरस्कार र प्रमाणपत्र प्रदान गरिँदा हल तालीले गुञ्जिएको थियो। त्यो क्षण केवल पुरस्कार वितरण मात्र थिएन—त्यो मेहनत, सपना र भविष्यप्रतिको विश्वासको उत्सव थियो। प्रमुख अतिथि राहुल श्रीवास्तवले आफ्नो मन्तव्यमा सूर्योदय स्कुलले छोटो समयमै हासिल गरेको उपलब्धि र ख्यातिको खुलेर प्रशंसा गरे। विशेषगरी “निःशुल्क छोरी शिक्षा अभियान” मार्फत नारी शिक्षामा पुर्याएको योगदानलाई उनले ऐतिहासिक कदमको रूपमा व्याख्या गरे। उनले विद्यालयका डाइरेक्टर विराज यादव र प्रिन्सिपल शिखा यादव को सामाजिक उत्तरदायित्वप्रति समर्पणलाई उदाहरणीय भन्दै सबैलाई त्यही मार्गमा अघि बढ्न आह्वान गरे। उनले स्पष्ट सन्देश दिए—“खेल केवल खेल होइन, यो स्वास्थ्य, अनुशासन र राष्ट्र चिनाउने माध्यम हो।
” प्रिन्सिपल शिखा यादवले विद्यार्थीहरूको चौतर्फी विकासका लागि शिक्षा मात्र नभई खेलकुद र अतिरिक्त क्रियाकलाप पनि उत्तिकै अनिवार्य रहेको बताइन्। उनले पढाइसँगै खेल र अन्य गतिविधिमा सक्रिय सहभागिता जनाउन विद्यार्थीहरूलाई प्रेरित गरिन्। डाइरेक्टर विराज यादवले भावुक हुँदै भने—विद्यालयको आजको उचाइ शिक्षकहरूको अथक मेहनत र अभिभावकहरूको अटल विश्वासकै परिणाम हो। उनले सबैप्रति कृतज्ञता व्यक्त गर्दै आगामी दिनमा अझ उत्कृष्ट शिक्षा प्रदान गर्ने प्रतिबद्धता व्यक्त गरे। कार्यक्रमको सहजीकरण शिक्षक सनी कुमार महतोले गरेका थिए, जसले सम्पूर्ण कार्यक्रमलाई व्यवस्थित र आकर्षक बनाएका थिए। बिरगञ्जबाट उठेको यो सन्देश स्पष्ट छ—जब शिक्षा, खेलकुद र सामाजिक उत्तरदायित्व एकसाथ अघि बढ्छन्, तब मात्र सशक्त राष्ट्र निर्माण सम्भव हुन्छ।
