छात्रवृत्ति शुल्क विवादले जनकपुरका विद्यालय बन्द हुने
-
दिपक सिंह
- today०२ मंसिर २०८१
वीरगंज | जनकपुरधाममा छात्रवृत्ति व्यवस्थापनसम्बन्धी विवादका कारण संस्थागत विद्यालयहरू बन्द हुने भएका छन्। हिसान, प्याब्सन, र एनप्याब्सनले जनकपुरधाम उपमहानगरपालिकाको निर्णयप्रति असन्तुष्टि जनाउँदै मंसिर ३ गतेदेखि विद्यालयहरू बन्द गर्ने घोषणा गरेका हुन्।
छात्रवृत्तिमा अध्ययनरत विद्यार्थीहरूबाट लिइने शुल्क निर्धारण विषयमा उपमहानगरपालिकाको ‘छात्रवृत्ति व्यवस्थापन समिति’ले तोकिएको भर्ना, मासिक, र परीक्षा शुल्क मात्र लिन निर्देशन दिएको थियो। तर विद्यालयहरूले यो निर्णयलाई अन्यायपूर्ण ठहर गर्दै विरोध गरेका छन्।
हिसान, प्याब्सन, र एनप्याब्सनले जारी गरेको संयुक्त विज्ञप्तिमा कार्यविधि २०७४ को व्यवस्थाअनुसार शुल्क लिने अधिकार रहेको दाबी गरेका छन्। तर उपमहानगरपालिकाको फरक खालको निर्देशनले आफूहरूलाई अन्याय परेको बताएका छन्।
संस्थागत विद्यालयहरूले यसअघि उपमहानगरपालिकालाई भरतपुर, वीरगञ्ज, विराटनगरलगायतका स्थानहरूको शुल्क व्यवस्थापनबारे तथ्य संकलन गर्न अनुरोध गरेका थिए। तर, उपमहानगरले कुनै पहल नगरेको आरोप लगाउँदै विद्यालय बन्दको कदम चालिएको विज्ञप्तिमा उल्लेख छ।
विद्यालय बन्दको निर्णयले अभिभावक र विद्यार्थीहरूमा अन्योल पैदा गरेको छ। विवाद समाधानका लागि स्थानीय सरकार र विद्यालयहरूबीच संवादको आवश्यकता देखिएको छ।
