प्रधानमन्त्री ओलीसहितको प्रतिनिधि मण्डल चीन प्रस्थान
-
राजु कुशवाहा
- today१७ मंसिर २०८१
वीरगञ्ज । प्रधानमन्त्री केपी शर्मा ओली नेतृत्वको नेपाली प्रतिनिधि मण्डल चीनका लागि प्रस्थान गरेको छ। चार दिने औपचारिक भ्रमणका क्रममा प्रधानमन्त्री ओली समकक्षी चीनका प्रधानमन्त्री ली छ्याङको निमन्त्रणामा चीन जानुभएको हो। यो प्रधानमन्त्री ओलीको कार्यकालको पहिलो औपचारिक चीन भ्रमण हो।
सोमबार बिहान ११ बजे त्रिभुवन विमानस्थलबाट हिमालयन एयरलाइन्सको चार्टर विमानमार्फत प्रधानमन्त्री ओली र उनका साथीसहितको टोली चीन प्रस्थान गरेको प्रधानमन्त्री कार्यालयले जानकारी दिएको छ। यस भ्रमणको सफलताका लागि मन्त्रीपरिषद् बैठकले शुभकामना व्यक्त गरेको थियो। बैठकले चीनले बनाउने दुई करोड डलर (लगभग दुई अर्ब ७० करोड रुपियाँ) बराबरको अनुदान योजनालाई स्वीकृति दिने निर्णय पनि गरेको थियो।
प्रधानमन्त्री ओलीको भ्रमणमा केही प्रमुख परियोजनाहरू अगाडि सारिने छन्। टोखा-खहरे सुरुङ मार्ग निर्माण, मुस्ताङको कोरला नाकामा आर्थिक क्षेत्र निर्माण, सङ्खुवासभाको किमाथान्का सडक निर्माण, रसुवागढीमा रेलमार्गको सम्भाव्यता अध्ययन, काठमाडौँको रिङरोडको दोस्रो चरण विस्तार, र चितवन क्यान्सर अस्पतालमा बोनम्यारो सेवा प्रवर्धनका लागि कदम चालिनेछन्।
यस भ्रमणको क्रममा बेल्ट एन्ड रोड इनिसिएटिभ (बिआरआई) कार्यान्वयन योजनामा केही संशोधनसहित हस्ताक्षर गरिनेछ। चीनले प्रस्ताव गरेको बिआरआई कार्यान्वयन योजना सम्झौतामा नेपाल सरकार र चीन सरकार बीच समन्वय पुर्याउने तयारी भएको छ।
प्रधानमन्त्री ओलीको चीन भ्रमणले नेपाल र चीनबीचका कूटनीतिक सम्बन्धलाई अझ प्रगाढ बनाउने अपेक्षा गरिएको छ। यस भ्रमणले दुई देशबीचको आर्थिक र व्यापारिक साझेदारीलाई थप सुदृढ गर्ने अवसर प्रदान गर्ने छ। विशेषगरी, चीनको बेल्ट एन्ड रोड इनिसिएटिभ (बिआरआई) को कार्यान्वयनका लागि नेपाल र चीनबीच सहकार्यलाई थप प्रभावकारी बनाउने योजनाहरू अघि सारिएको छ।
नेपालका लागि चीनसँगको सम्बन्ध महत्त्वपूर्ण छ, र प्रधानमन्त्री ओलीको यो भ्रमणले दुई मुलुकका बीचमा यातायात, पूर्वाधार, व्यापार र पर्यटन क्षेत्रहरूमा नयाँ सम्भावनाहरू खोलेको छ। साथै, चीनसँगको कनेक्टिभिटी र पारस्परिक लाभको अवसरलाई बढी सुदृढ पार्ने योजनामा नेपालले ध्यान केन्द्रित गरेको छ।
प्रधानमन्त्री ओलीको चीन भ्रमणका क्रममा द्विपक्षीय सहमति र सम्झौताहरूमा हस्ताक्षर हुने सम्भावना पनि छ, जसले दुवै मुलुकलाई समृद्धिको मार्गमा अघि बढ्न थप सहयोग पुर्याउने विश्वास गरिएको छ। नेपालको विकासमा चीनको योगदान महत्वपूर्ण रहेको भन्दै प्रधानमन्त्री ओलीले यस भ्रमणलाई रणनीतिक दृष्टिकोणबाट महत्त्वपूर्ण कदमका रूपमा लिएका छन्।
नेपाल र चीनबीचका कूटनीतिक सम्बन्धलाई अझ प्रगाढ बनाउन र साझा विकासका अवसरहरूमा प्रगति गर्न प्रधानमन्त्री ओलीको यो भ्रमण फलदायी हुने विश्वास गरिएको छ।
