विद्यालयदेखि विश्वविद्यालयसम्म सेयर बजार शिक्षा सेबोनको राष्ट्रिय लगानीकर्ता शिक्षा अभियान सुरु
-
संजय कुशवाहा
- today३१ असार २०८३
काठमाडौँ । नेपाल धितोपत्र बोर्ड (SEBON) ले देशभर वित्तीय साक्षरता विस्तार तथा सचेत लगानी संस्कृतिको विकास गर्ने उद्देश्यले ‘राष्ट्रिय लगानीकर्ता शिक्षा अभियान’ सञ्चालन गर्ने घोषणा गरेको छ।
बोर्डले सार्वजनिक गरेको नयाँ नीतिअनुसार शिक्षा, विज्ञान तथा प्रविधि मन्त्रालयसँग समन्वय गरी विद्यालय तथा विश्वविद्यालयको पाठ्यक्रममै पूँजी बजार (सेयर बजार) सम्बन्धी विषय समावेश गरिनेछ। यसबाट विद्यार्थीहरूलाई सानैदेखि लगानी, वित्तीय योजना तथा पूँजी बजारबारे व्यावहारिक ज्ञान प्रदान गर्ने लक्ष्य राखिएको छ।
यस्तै, शिक्षकहरूको क्षमता अभिवृद्धिका लागि विशेष तालिम सञ्चालन गरिने, डिजिटल लर्निङ प्लेटफर्म, मोबाइल एप तथा अनलाइन अध्ययन सामग्री विकास गरिने बोर्डले जनाएको छ।
अभियानअन्तर्गत युवा, महिला तथा गैरआवासीय नेपाली (एनआरएन) लाई लक्षित विशेष लगानीकर्ता शिक्षा कार्यक्रमसमेत सञ्चालन गरिनेछ। बोर्डका अनुसार यस पहलले सुरक्षित, सचेत र जिम्मेवार लगानी संस्कृतिको विकासमा महत्वपूर्ण योगदान पुर्याउने अपेक्षा गरिएको छ।
सेबोनले यस अभियानमार्फत नेपालको पूँजी बजारलाई थप समावेशी, आधुनिक र दीर्घकालीन रूपमा सुदृढ बनाउने लक्ष्य लिएको जनाएको छ।
