पोखराको फोहोर प्रशोधन केन्द्र अलपत्र जग्गा नै टुंगो नलाग्दा निर्माण अझै सुरु भएन
-
रुस्तम देवान
- today३१ असार २०८३
पोखरा । पोखरा महानगरपालिकाले लामो समयदेखि घोषणा गर्दै आएको फोहोर प्रशोधन केन्द्र निर्माण अझै अन्योलमै रहेको छ। मेयर धनराज आचार्यले परियोजना अन्तिम चरणमा पुगेको दाबी गरे पनि केन्द्र निर्माणका लागि आवश्यक जग्गाको टुंगो लाग्न सकेको छैन।
महानगरले ३३ नम्बर वडामा प्रशोधन केन्द्र निर्माण प्रक्रिया अघि बढाए पनि जग्गा विवाद र स्थानीयको विरोधका कारण काम रोकिएको हो। यसअघि छनोट गरिएको स्थानमा विवाद भएपछि कार्यपालिकाले पुनः नयाँ जग्गा खोज्न समिति गठन गरेको छ।
झण्डै १ अर्ब रुपैयाँ लागतमा टेरासल्व रिन्यूयवल कम्पनीलाई निर्माणको जिम्मा दिइए पनि जग्गा उपलब्ध नभएकाले काम सुरु हुन सकेको छैन। अहिले पोखराको फोहोर अस्थायी रूपमा विभिन्न स्थानमा व्यवस्थापन हुँदै आएको छ।
महानगरमा दैनिक करिब २०९ टन फोहोर उत्पादन हुने गरेको छ। नयाँ समितिले एक महिनाभित्र उपयुक्त जग्गा सिफारिस गर्ने जिम्मेवारी पाएको छ।
