विभिन्न जिल्लाबाट लागूऔषधसहित २५ जना पक्राउ ठूलो परिमाणमा लागूऔषध बरामद
-
रुस्तम देवान
- today३१ असार २०८३
काठमाडौँ । देशका विभिन्न १२ जिल्लामा प्रहरीले सञ्चालन गरेको लागूऔषधविरुद्धको विशेष अभियानमा २५ जना पक्राउ परेका छन्। नवलपरासी, तनहुँ, महोत्तरी, झापा, रोल्पा, मोरङ, बाँके, मुगु, सुनसरी, सिराहा, कैलाली र सुर्खेतबाट उनीहरूलाई नियन्त्रणमा लिइएको हो।
प्रहरीले डाइजेपाम, फेनारगन, बुप्रेनोर्फिन, गाँजा, ब्राउनसुगर, खैरो हेरोइन तथा चरेस बरामद गरेको जनाएको छ। विभिन्न स्थानमा सवारीसाधन जाँच र विशेष निगरानीका क्रममा लागूऔषधसहित उनीहरू पक्राउ परेका हुन्।
बरामद लागूऔषधमध्ये सयौँ एम्पुल इन्जेक्सन, करिब ११.५ किलो गाँजा, ठूलो परिमाणमा ब्राउनसुगर तथा चरेस समेत रहेको प्रहरीले जनाएको छ। पक्राउ परेकामध्ये केही भारतीय नागरिक पनि रहेका छन्।
प्रहरीले पक्राउ परेका सबैविरुद्ध लागूऔषध सम्बन्धी कसुरमा मुद्दा दर्ता गर्ने तयारी गरेको छ भने घटनाका सम्बन्धमा थप अनुसन्धान जारी रहेको जनाएको छ।
