गृहमन्त्री–मिटरब्याज पीडितबीच दोस्रो चरणको वार्ता सम्पन्न सहमति नभए भोलिदेखि काठमाडौँ मार्च
-
बिराज यादव
- today३० असार २०८३
काठमाडौं । जनकपुरधामबाट सुरु भएको मिटरब्याजविरुद्धको पैदल न्याय मार्चको छैटौँ दिन बाराको निजगढमा नेपाल सरकारका गृहमन्त्री सुधन गुरुङ र आन्दोलनरत मिटरब्याज पीडितबीच दोस्रो चरणको वार्ता सम्पन्न भएको छ।
मिटरब्याज तथा ठगीविरुद्ध किसान–मजदुर सङ्घर्ष समितिका प्रवक्ता नवीन निर्गका अनुसार वार्तामा आन्दोलनकारीले आफ्ना ६ बुँदे माग स्पष्ट रूपमा गृहमन्त्रीसमक्ष प्रस्तुत गरेका छन्। विशेषगरी सरकारले विगतमा गठन गरेका तीनवटा आयोगका प्रतिवेदन तत्काल सार्वजनिक गर्न माग गरिएको उनले बताए।
प्रवक्ता निर्गले आन्दोलनकारीको अडान स्पष्ट रूपमा राखिएको भए पनि गृहमन्त्रीबाट मागबारे अहिलेसम्म कुनै ठोस प्रतिबद्धता नआएको बताए।
हाल दुवै पक्ष आ–आफ्नो तर्फबाट आन्तरिक छलफल र वार्ताको समीक्षा गरिरहेका छन्। सङ्घर्ष समितिले वार्ताबाट ठोस सहमति नभए भोलिदेखि काठमाडौँतर्फको पैदल न्याय मार्च पुनः सुरु गर्ने चेतावनी दिएको छ।
प्रवक्ता निर्गले भने, “यदि वार्ताबाट निष्कर्ष निस्किएन भने हामी भोलिदेखि फेरि पैदल यात्रामार्फत काठमाडौँतर्फ अघि बढ्छौँ।”
