गृहमन्त्री भेट्ने आशामा निजगढमै रोकिए मिटरब्याज पीडित न्याय मार्च स्थगित
-
संजय कुशवाहा
- today३० असार २०८३
निजगढ (बारा) । गृहमन्त्री सुधन गुरुङ मिटरब्याज पीडितलाई भेट्न आउने खबरपछि ‘पैदल न्याय मार्च’ मा रहेका पीडितहरू बाराको निजगढमै रोकिएका छन्।
मिटरब्याज पीडितका नेता मनोज पासवानका अनुसार उनीहरू आज बिहान पैदल मार्चमा निस्किसकेका थिए। करिब दुई सय मिटर अघि बढेपछि स्थानीय प्रहरीले गृहमन्त्री भेट्न आउन लागेको जानकारी दिएपछि उनीहरू पुनः फर्केर उद्योग वाणिज्य संघको सभाहलमै बसेका छन्।
“हामी बिहान पैदल मार्चमा निस्किसकेका थियौं। करिब दुई सय मिटर अघि बढेपछि स्थानीय प्रहरीले गृहमन्त्री आउन लागेको जानकारी दियो। त्यसपछि हामी फर्केर फेरि हलमै बसेका छौं,” पासवानले बताए।
असार २५ गते जनकपुरधामको तिरुतियागाछीबाट सुरु भएको मिटरब्याज पीडितको ‘पैदल न्याय मार्च’ सोमबार साँझ बाराको निजगढ पुगेको थियो। गृहमन्त्रीसँगको भेटबाट आफ्ना मागको सम्बोधन हुने अपेक्षामा पीडितहरू हाल निजगढमै प्रतीक्षामा रहेका छन्।
