सञ्चारगृहअगाडि शंकास्पद गाडी पार्किङ पत्रकार महासंघको गम्भीर ध्यानाकर्षण
-
रुस्तम देवान
- today२९ असार २०८३
काठमाडौं। नेपाल पत्रकार महासंघले विभिन्न सञ्चारमाध्यमको कार्यालयको गेटमै शंकास्पद रूपमा सवारीसाधन पार्किङ गरी पत्रकारको आवतजावतमा अवरोध तथा त्रास सिर्जना गरिएको घटनाप्रति गम्भीर ध्यानाकर्षण भएको जनाएको छ।
महासंघले सोमबार जारी गरेको विज्ञप्तिअनुसार बिहान ७ बजेदेखि तीनकुनेस्थित कान्तिपुर पब्लिकेशन, नयाँबानेश्वरस्थित अनलाइनखबर तथा मध्यबानेश्वरस्थित हिमालय टेलिभिजनको कार्यालय गेटमै सवारीसाधन पार्किङ गरिएकाले सञ्चारकर्मीको आवतजावतमा समस्या उत्पन्न भएको जनाएको छ।
महासंघले उक्त अवरोध तत्काल हटाई सञ्चारकर्मी तथा सञ्चारगृहको सुरक्षा सुनिश्चित गर्न सम्बन्धित निकायसँग माग गरेको छ। साथै घटनाको निष्पक्ष छानबिन गरी दोषीमाथि कानुनबमोजिम आवश्यक कारबाही गर्न पनि आग्रह गरेको छ।
महासंघले विज्ञप्तिमार्फत अवरोध हटाउन सुरक्षा निकायसँग आवश्यक समन्वय भइरहेको जानकारीसमेत दिएको छ।
