नेपाल टेलिकमका निलम्बित एमडी सुनिल पौडेलविरुद्ध २३.७५ करोडको भ्रष्टाचार मुद्दामा सुनुवाइ सुरु
-
रुस्तम देवान
- today२९ असार २०८३
काठमाडौं। नेपाल टेलिकमका निलम्बित प्रबन्ध निर्देशक सुनिल पौडेलविरुद्ध गैरकानुनी सम्पत्ति आर्जनसम्बन्धी भ्रष्टाचार मुद्दाको सुनुवाइ विशेष अदालतमा सुरु भएको छ।
विशेष अदालतका अध्यक्ष सुदर्शनदेव भट्ट तथा न्यायाधीश हेमन्त रावल र डिल्लीरत्न श्रेष्ठको संयुक्त इजलासमा मुद्दाको सुनुवाइ प्रारम्भ भएको हो।
अख्तियार दुरुपयोग अनुसन्धान आयोगले २०८१ वैशाख ९ गते पौडेलविरुद्ध सार्वजनिक पदमा रहँदा गैरकानुनी रूपमा सम्पत्ति आर्जन गरेको आरोप लगाउँदै २३ करोड ७५ लाख ४६ हजार रुपैयाँभन्दा बढी बिगो दाबी गरी भ्रष्टाचार मुद्दा दर्ता गरेको थियो। आयोगले उनका दाजु अनिल पौडेलविरुद्ध पनि सम्पत्ति जफतको मागसहित मुद्दा दायर गरेको छ।
अख्तियारका अनुसार पौडेलले पारिश्रमिक, भत्ता, सेयरलगायतबाट जम्मा १ करोड १९ लाख २४ हजार ८४६ रुपैयाँ वैध आम्दानी गरेका थिए। तर, २४ करोड ९४ लाख ७१ हजार १७१ रुपैयाँ खर्च तथा लगानी गरेको देखिएको छ। आम्दानी र खर्चको तुलना गर्दा २३ करोड ७५ लाख ४६ हजार ३२४ रुपैयाँ बराबरको सम्पत्ति र खर्चको स्रोत पुष्टि हुन नसकेको अख्तियारको दाबी छ।
पौडेल २०६१ जेठ २० गते राष्ट्रिय सूचना प्रविधि केन्द्रमा करार सेवाबाट सरकारी सेवामा प्रवेश गरेका थिए। त्यसपछि विभिन्न सार्वजनिक पदमा कार्यरत रहँदै २०७८ चैत २४ गते नेपाल टेलिकमको प्रबन्ध निर्देशक नियुक्त भएका थिए। अख्तियारले २०६१ देखि २०७९ फागुन ३० गतेसम्मको अवधिमा उनले आर्जन गरेको सम्पत्तिमाथि अनुसन्धान गरी मुद्दा दायर गरेको हो।
