आजको प्रतिनिधिसभा बैठकमा महत्वपूर्ण एजेन्डाको चाङ सरकारले ल्याउँदै निर्णायक प्रतिवेदन र विधेयक
-
रुस्तम देवान
- today२५ असार २०८३
काठमाडौं । संघीय संसद् प्रतिनिधिसभाको बैठक आज बिहान ११ बजे बस्दै छ। बैठकमा सरकारका तर्फबाट विभिन्न महत्वपूर्ण वार्षिक प्रतिवेदन र विधेयक प्रस्तुत गरिने कार्यसूची रहेको छ।
संसद् सचिवालयका अनुसार प्रधानमन्त्री वालेन्द्र शाहको तर्फबाट कानुन, न्याय तथा संसदीय मामिलामन्त्री सोबिता गौतमले ‘महान्यायाधिवक्ताको वार्षिक प्रतिवेदन २०८१–२०८२’ प्रतिनिधिसभामा पेस गर्नेछिन्। साथै, ‘अख्तियार दुरुपयोग अनुसन्धान आयोगको ३५औँ वार्षिक प्रतिवेदन २०८१–२०८२’ पनि आजकै बैठकमा प्रस्तुत गरिनेछ।
त्यसैगरी, मन्त्री गौतमले ‘राष्ट्रिय सेवा दल विधेयक, २०८३’ संसद्मा प्रस्तुत गर्ने कार्यसूची रहेको छ। बैठकमा ‘नेपाल विशेष सेवा ऐन, २०४२ को साविकको व्यवस्था जगाउने सम्बन्धी विधेयक, २०८३’ माथि विचार गरियोस् भन्ने प्रस्ताव पनि पेश हुने संसद् सचिवालयले जनाएको छ।
आजको बैठकमा सरकारका तर्फबाट प्रस्तुत हुने प्रतिवेदन र विधेयकहरू सुरक्षा, सुशासन तथा कानुनी व्यवस्थासँग प्रत्यक्ष जोडिएका विषय भएकाले प्रतिनिधिसभाको बैठकलाई विशेष महत्वका साथ हेरिएको छ।
