प्रतिनिधि सभाबाट दुई महत्त्वपूर्ण विधेयक समितिमा दफावार छलफलको बाटो खुल्यो
-
रुस्तम देवान
- today२४ असार २०८३
काठमाडौँ । प्रतिनिधि सभाले नेपाल राष्ट्र बैंक (तेस्रो संशोधन) विधेयक, २०८३ र पर्यटन विधेयक, २०८२ लाई दफावार छलफलका लागि सम्बन्धित संसदीय समितिमा पठाउने प्रस्ताव सर्वसम्मतिले स्वीकृत गरेको छ।
बुधबार बसेको प्रतिनिधि सभा बैठकमा अर्थमन्त्री डा. स्वर्णिम वाग्लेले प्रस्तुत गरेको नेपाल राष्ट्र बैंक (तेस्रो संशोधन) विधेयक, २०८३ लाई सम्बन्धित समितिमा पठाउने प्रस्ताव सर्वसम्मतिले पारित भएको हो। अब उक्त विधेयकमाथि समितिमा दफावार छलफल गरी आवश्यक सुझावसहित प्रतिवेदन तयार गरिनेछ।
त्यसैगरी राष्ट्रिय सभामा उत्पत्ति भएको पर्यटन विधेयक, २०८२ लाई पनि दफावार छलफलका लागि सम्बन्धित संसदीय समितिमा पठाउने संस्कृति, पर्यटन तथा नागरिक उड्डयनमन्त्री खडकराज पौडेलको प्रस्ताव प्रतिनिधि सभाबाट सर्वसम्मतिले स्वीकृत भएको छ।
प्रतिनिधि सभाको यो निर्णयसँगै दुवै विधेयक कानुन निर्माण प्रक्रियाको अर्को चरणमा प्रवेश गरेका छन्। समितिको छलफलपछि आवश्यक संशोधनसहित प्रतिवेदन प्रतिनिधि सभामा पेश गरिनेछ, त्यसपछि विधेयक पारित गर्ने प्रक्रियाले थप गति लिनेछ।
