३ करोड ५१ लाखभन्दा बढीका अवैध सामग्री बरामद राजस्व चुहावट नियन्त्रणमा संयुक्त अभियान प्रभावकारी
-
रुस्तम देवान
- today१६ असार २०८३
रसुवा असार १६ चालु आर्थिक वर्षको साउनदेखि चैत मसान्तसम्म रसुवा भन्सार कार्यालय जिल्ला प्रहरी कार्यालय र सशस्त्र प्रहरी बलको संयुक्त अभियानबाट रु ३ करोड ५१ लाख ७६ हजार ४२० बराबरका अवैध सामग्री बरामद गरिएको छ। राजस्व चुहावट नियन्त्रण अभियानअन्तर्गत सञ्चालन गरिएको संयुक्त कारबाहीमा भन्सार कार्यालयले १५, जिल्ला प्रहरीले १९ र सशस्त्र प्रहरी बल नम्बर २० गुल्मले २३ पटक विभिन्न स्थानमा छापा तथा जाँच अभियान सञ्चालन गरेका थिए। बरामद सामग्रीमा चकलेट, अचार, चाउमिनमा प्रयोग हुने सस, तयारी पोसाक, रोल कपडा, कफी, बालबालिकाका खेलौना, थर्मस, भेप, चुरोटलगायतका सामग्री रहेका छन्। भन्सार कार्यालयका अनुसार
बरामद गरिएका वस्तुमध्ये ८० प्रतिशतभन्दा बढी खाद्य उपभोग्य सामग्री छन्। भन्सार कार्यालयका सूचना अधिकारी करवीर गैह्रेले प्रारम्भिक रूपमा बजार मूल्यका आधारमा मूल्याङ्कन गरिए पनि अन्तिम मूल्य खाद्य गुण नियन्त्रण परीक्षण, अन्तर्राष्ट्रिय बजार मूल्य तथा मूल्य निर्धारण समितिको निर्णयका आधारमा कायम गरिने जानकारी दिए। बिक्रीयोग्य सामग्री लिलाम गरिने र खान अयोग्य वस्तु सम्बन्धित निकायको रोहवरमा नष्ट गरिने व्यवस्था रहेको उनले बताए।
जिल्ला प्रहरी प्रमुख अशोक थापाका अनुसार गस्ती, सवारीसाधन जाँच तथा प्राप्त सूचनाका आधारमा फेला परेका अवैध सामग्री नियन्त्रणमा लिएर तत्काल भन्सार कार्यालयमा बुझाउने कार्यलाई निरन्तरता दिइएको छ। सम्बन्धित निकायले तस्करी तथा राजस्व चुहावट नियन्त्रणका लागि आगामी दिनमा समेत संयुक्त अभियानलाई अझ प्रभावकारी बनाइने जनाएको छ।
