संसद् सचिवालयले ल्यायो असार ८ सम्मको क्यालेन्डर, छैन प्रधानमन्त्री बालेनको सम्बोधनको विषय
-
अजय भोजपुरिया
- today२ जेठ २०८३
काठमाडौं । नयाँ सरकार गठनसँगै नयाँ प्रधानमन्त्रीले संसद्लाई सम्बोधन गर्ने र आफ्नो सरकारका प्राथमिकता तथा प्रतिबद्धता संसद्मार्फत जनतामाझ लैजाने परम्परा रास्वपा नेतृत्वको सरकारले तोडेको छ ।प्रतिनिधिसभाले आगामी असार ८ गतेसम्मको संसदीय क्यालेन्डर सार्वजनिक गरेको छ । तर, उक्त क्यालेन्डरमा प्रधानमन्त्रीसँग हुने प्रत्यक्ष प्रश्नोत्तर कार्यक्रम समावेश गरिएको छैन ।
प्रतिनिधिसभा नियमावलीको नियम ५६ मा प्रधानमन्त्रीसँग प्रत्यक्ष प्रश्नोत्तरसम्बन्धी व्यवस्था छ । उक्त नियममा भनिएको छ, ‘प्रधानमन्त्री वा निजको कार्यक्षेत्रसँग प्रत्यक्ष रूपमा सम्बन्धित महत्त्वपूर्ण विषयमा प्रश्न सोध्नका लागि सभामुखले प्रत्येक महिनाको पहिलो हप्ताको कुनै एक दिनको बैठकको पहिलो एक घण्टा निर्धारण गर्नेछ ।’
प्रतिनिधिसभा नियमावलीअनुसार जेठ र असार महिनामा कम्तीमा एक–एक पटक प्रधानमन्त्रीसँग प्रत्यक्ष प्रश्नोत्तर कार्यक्रम हुनुपर्ने हो । तर, दुवै महिनाका लागि सार्वजनिक गरिएको क्यालेन्डरमा उक्त कार्यक्रम राखिएको छैन ।
