बीरगञ्जमा भव्य र सभ्य रूपमा सम्पन्न भयो हनुमान जयन्ती शोभायात्रा
-
संजय कुशवाहा
- today२१ चैत्र २०८२
वीरगञ्ज, २१ चैत — वीरगञ्जमा हनुमान जयन्तीको अवसरमा निकालिएको भव्य शोभायात्रा शान्तिपूर्ण, सभ्य र व्यवस्थित रूपमा सम्पन्न भएको छ। धार्मिक आस्था, सामाजिक सद्भाव र जनसहभागिताले शोभायात्रालाई अझ भव्य बनाएको थियो। यस वर्षको हनुमान जयन्ती शोभायात्रालाई शान्तिपूर्ण र मर्यादित बनाउन जिल्ला प्रहरी कार्यालय पर्साका प्रमुख प्रहरी उपरीक्षक (एसपी) सुदीप राज पाठक को महत्वपूर्ण भूमिका देखिएको सहभागीहरूले बताएका छन्। सुरक्षाको प्रभावकारी व्यवस्थापन, प्रहरीको चुस्त परिचालन र संवेदनशील समन्वयका कारण कार्यक्रम कुनै अप्रिय घटना बिना सफलतापूर्वक सम्पन्न भएको हो। शोभायात्रामा हजारौं श्रद्धालु, युवा, सामाजिक अगुवा तथा विभिन्न संघसंस्थाका प्रतिनिधिहरूको उल्लेखनीय सहभागिता रहेको थियो। नगरका विभिन्न क्षेत्र परिक्रमा गर्दै निकालिएको शोभायात्रामा भक्तजनहरूले जयघोष, भजन–कीर्तन र धार्मिक उत्साहका साथ सहभागिता जनाएका थिए। कार्यक्रमलाई भव्य, सभ्य र सुरक्षित बनाउन सुरक्षा निकाय, आयोजक समिति तथा स्थानीयवासीबीचको सहकार्य प्रशंसनीय देखिएको छ। विशेषगरी, एसपी पाठकको नेतृत्वमा प्रहरी प्रशासनले निर्वाह गरेको जिम्मेवारीले वीरगञ्जमा धार्मिक कार्यक्रम पनि अनुशासित र शान्तिपूर्ण रूपमा सम्पन्न गर्न सकिन्छ भन्ने सकारात्मक सन्देश दिएको छ। स्थानीयवासीहरूले पनि प्रहरी प्रशासनको भूमिकाको खुलेर प्रशंसा गर्दै आगामी दिनमा यस्ता धार्मिक तथा सांस्कृतिक कार्यक्रमहरू अझ व्यवस्थित रूपमा सञ्चालन हुने विश्वास व्यक्त गरेका छन्।
