समाज कता जाँदैछ ? युवा कुलतमा, देशको भविष्य संकटमा !
-
संजय कुशवाहा
- today१२ चैत्र २०८२
वीरगञ्ज । हामी हरेक दिन देश विकास, समृद्धि, रोजगारी, शिक्षा, सुशासन र भविष्य निर्माण का कुरा गर्छौं। तर, यथार्थ भने अर्कै छ। हाम्रो समाजका युवा पुस्ता लागूऔषध दुर्व्यसन र कुलतको दलदलमा फस्दै गएका छन्। यो केवल व्यक्तिगत समस्या होइन, यो समाज, परिवार र राष्ट्रकै भविष्यसँग जोडिएको गम्भीर संकट हो। आजको युवा नै भोलिको देशको कर्णधार हो। तर, जब त्यही युवा नशा, गलत संगत, हिंसा र अपराधको बाटोमा लाग्छ, तब देशले विकासको सपना कसरी देख्न सक्छ ? यदि युवाशक्ति नै कमजोर भयो भने राष्ट्रको मेरुदण्ड नै भाँचिन्छ। लागूऔषध र दुर्व्यसनले केवल एक व्यक्तिलाई नष्ट गर्दैन, यसले घर-परिवार उजाड्छ, समाजमा डर पैदा गर्छ र अपराधको जरा गाड्छ। आज समाजमा बढिरहेका चोरी, डकैती, हत्या, हिंसा, बलात्कार, झैझगडा र असामाजिक गतिविधिहरूको जडमा धेरै हदसम्म दुर्व्यसन र कुलत नै रहेको तीतो यथार्थ कसैले नकार्न सक्दैन। किन गम्भीर छ यो समस्या ? कुलतमा फसेका युवाले आफ्नो भविष्य आफैं नष्ट गरिरहेका छन्। परिवारले सन्तान गुमाएको पीडा बोकिरहेका छन्। समाजले शक्तिशाली जनशक्ति गुमाइरहेको छ। राष्ट्रले उत्पादनशील, सिर्जनशील र नेतृत्वदायी पुस्ता हराउँदै लगेको छ। यदि यस्ता कुलतमा फसेका व्यक्तिहरूलाई समयमै सुधार, परामर्श, उपचार र सही बाटो दिन सकियो भने समाजमा हुने ५० प्रतिशतभन्दा बढी अपराध स्वतः कम हुन सक्छ। अब के गर्ने ? अब केवल भाषण, नाराबाजी र कागजी योजना ले पुग्दैन। हामीले अब युवालाई बचाउने अभियान सुरु गर्नैपर्छ। आवश्यक कदमहरू : विद्यालय तथा कलेजस्तरमै लागूऔषधविरुद्ध सचेतना अभियान अभिभावक, शिक्षक र समाजसेवीको संयुक्त निगरानी कुलतमा फसेकालाई घृणा होइन, सुधार र पुनर्स्थापनाको अवसर सीमावर्ती क्षेत्रमा लागूऔषध ओसारपसारमाथि कडा नियन्त्रण स्थानीय सरकार, प्रहरी प्रशासन र समुदायबीच समन्वित अभियान निष्कर्ष देश बनाउने कुरा सडक, भवन र पुल मात्र होइन, देश बनाउने आधार भनेको सचेत, सक्षम र स्वस्थ युवा पुस्ता हो। यदि आज हामीले युवालाई कुलतबाट जोगाउन सकेनौं, भोलि हामीले देश गुमाएको पीडा भोग्नुपर्ने दिन टाढा नहुन सक्छ। त्यसैले आजको सबैभन्दा ठूलो आवश्यकता हो— “युवालाई जोगाऔं, समाजलाई बचाऔं, देशको भविष्य सुरक्षित बनाऔं।”
