चितवनमा ठूलो अफिम काण्ड: तीन वडामा फैलिएको अवैध खेती प्रहरीले ध्वस्त पार्यो
-
संजय कुशवाहा
- today४ चैत्र २०८२
चितवन — देशभर लागूऔषध नियन्त्रण अभियान तीव्र बनिरहेका बेला चितवन जिल्लाबाट ठूलो परिमाणमा अफिम खेती फडानी गरिएको सनसनीपूर्ण घटना सार्वजनिक भएको छ। राप्ती नगरपालिकाका वडा नं. १०, ११ र १२ मा लुकिछिपी रूपमा लगाइएको अवैध अफिम खेती प्रहरीले व्यापक अपरेशनमार्फत पूर्ण रूपमा नष्ट गरेको हो।
इलाका प्रहरी कार्यालय भण्डाराबाट प्रहरी सहायक निरीक्षक खुसबहादुर बस्नेतको कमाण्डमा खटिएको विशेष गस्ती टोलीले गुप्त सूचनाका आधारमा उक्त क्षेत्रको निगरानी गर्दै आएको थियो। अन्ततः योजनाबद्ध रूपमा सञ्चालन गरिएको अपरेशनमा सयौं रोपनी क्षेत्रफलमा फैलिएको अफिम खेती फेला पारेर तत्कालै फडानी गरी नष्ट गरिएको प्रहरीले जनाएको छ।
स्थानीय बासिन्दाहरूका अनुसार उक्त क्षेत्रमा केही समयदेखि शंकास्पद गतिविधि बढेको थियो। तर, खेती यति ठूलो परिमाणमा भइरहेको भन्ने कुरा बाहिर आउन सकेको थिएन। प्रहरीले भने यसलाई संगठित अवैध नेटवर्कसँग जोडेर अनुसन्धान अगाडि बढाएको संकेत दिएको छ।
प्रहरी स्रोतका अनुसार, अफिम खेती पछाडि संलग्न व्यक्तिहरूको खोजी तीव्र पारिएको छ र चाँडै नै केही पक्राउ पर्ने सम्भावना रहेको छ। “यो सामान्य खेती होइन, योजनाबद्ध रूपमा गरिएको अवैध कारोबारको हिस्सा हुन सक्छ,” एक प्रहरी अधिकारीले बताए।
यस घटनाले चितवन मात्र नभई देशभर लागूऔषध उत्पादन र तस्करीको जोखिम बढ्दै गएको संकेत दिएको भन्दै सुरक्षा निकाय सतर्क बनेका छन्। सरकारले लागूऔषध नियन्त्रणलाई राष्ट्रिय प्राथमिकतामा राख्दै कडा कदम चाल्नुपर्ने आवश्यकता पुनः उजागर भएको छ।
स्थानीय तह, प्रहरी र समुदायबीच समन्वय गरेर यस्ता अवैध गतिविधि नियन्त्रण नगरे भविष्यमा ठूलो सामाजिक र सुरक्षाजन्य चुनौती निम्तिन सक्ने चेतावनी पनि दिइएको छ।
