डिजिटल ठगी बढ्दै गएपछि सचेत रहन राष्ट्र बैंकको आग्रह
-
संजय कुशवाहा
- today९ माघ २०८२
वीरगञ्ज, मिति २०८२/१०/०९ नेपाल राष्ट्र बैंकले वीरगञ्जमा डिजिटल ठगी तथा साइबर स्क्याम बढ्दो क्रममा रहेको भन्दै यसप्रति सचेत रहन पत्रकार सम्मेलनमार्फत आग्रह गरेको छ। राष्ट्र बैंकले पछिल्लो समय इन्भेस्टमेन्ट, रोजगारी, रिलेसनसिप, अनपेक्षित रकम, किनबेच, धम्की र नक्कली पहिचान (इम्पर्सोनेसन) जस्ता माध्यमबाट ठगीका घटनाहरू तीव्र रूपमा बढिरहेको जनाएको छ। सम्मेलनमा प्रस्तुत विवरण अनुसार ठगीका क्रममा सजिलो पैसा कमाउने प्रलोभन, अस्वाभाविक भाषा, शंकास्पद लिंक तथा एटेचमेन्ट, तुरुन्त निर्णय गर्न दबाब, असामान्य भुक्तानी माग र नयाँ Pay ID माग प्रमुख ‘रेड फ्ल्याग’का रूपमा देखिएका छन्।
राष्ट्र बैंकले सेवाग्राहीलाई युजरनेम, पासवर्ड, पिन र OTP कसैसँग पनि साझा नगर्न, बलियो पासवर्ड तथा मल्टि–फ्याक्टर अथेन्टिकेसन प्रयोग गर्न, इमेल, एसएमएस, मोबाइल, एप्लिकेसन र नेटवर्क सुरक्षित राख्न सुझाव दिएको छ। साथै अन्तर–एप डेटा सेयरिङ र अनुमति (Permissions) सम्बन्धी जोखिमबारे सचेत रहन पनि आग्रह गरिएको छ। डिजिटल ठगीका कारण सूचनाको दुरुपयोग, आर्थिक नोक्सानी र मानसिक असर समेत पर्न सक्ने उल्लेख गर्दै राष्ट्र बैंकले ठगीबाट बच्न Stop–Check–Protect सूत्र अपनाउन आग्रह गरेको छ। शंका लागेमा रकम वा व्यक्तिगत जानकारी नदिन, सन्देश वा फोन नक्कली हुनसक्ने सम्भावना जाँच गर्न र ठगी भएमा तुरुन्त बैंक, प्रहरी तथा नियामक निकायमा जानकारी गराउन भनिएको छ। राष्ट्र बैंकले वित्तीय अनुशासन र डिजिटल सुरक्षा सम्बन्धी जनचेतना अभिवृद्धि गर्न यस्ता कार्यक्रमलाई निरन्तरता दिने जनाएको छ।
