दुई देशका मालिक ? अहिरवलियाका नागेन्द्र यादव परिवारमाथि नेपाली नागरिकता, सम्पत्ति र राष्ट्रिय सुरक्षासँग जोडिएको गम्भीर आरोप
-
अग्निपथ सम्बादाता
- today२ माघ २०८२
भारत बिहारस्थित अहिरवलियाका नागेन्द्र यादव, उनकी श्रीमती राबडी देवी, छोरा ओमप्रकाश यादव र नाती आयुष यादव—तीन पुस्तादेखि दुई देशका मालिक बनेको आरोप सार्वजनिक बहसमा आएको छ। स्रोतहरूको दाबीअनुसार उनीहरू भारतसँग स्थायी सम्बन्ध कायम रहँदै नेपालमा समेत प्रभावशाली हैसियत बनाउँदै आएका छन्, जसले राष्ट्रिय स्तरमै गम्भीर प्रश्नहरू खडा गरेको छ। आरोप अनुसार, नागेन्द्र यादवले वर्षौँअघि नेपालमा अरूको बाबुलाई आफ्नै बाबु देखाएर नागरिकता लिएको भनिन्छ। यही नागरिकताको आधारमा उनले नेपालमा आफ्नो पहिचान मजबुत बनाउँदै गएको र त्यसपछि व्यापक सम्पत्ति विस्तार गरेको दाबी गरिएको छ।
यस्ता आरोपले नेपालको नागरिकता प्रणाली कति सुरक्षित छ भन्ने विषयमा गहिरो चिन्ता पैदा गरेको छ। उपलब्ध दाबीहरू अनुसार, नागेन्द्र यादव र उनको परिवारको नाममा वीरगञ्जदेखि चितवनको नारायणघाट र शारदा नगर टाउनसम्म घर–जग्गाको ठूलो सञ्जाल फैलिएको छ। सीमावर्ती क्षेत्रदेखि भित्री शहरसम्म फैलिएको यो सम्पत्ति विस्तार सामान्य होइन भन्ने जनगुनासो बढ्दो छ। यस प्रकरणले केही मूलभूत प्रश्नहरू उठाएको छ—भारतसँग ठेगाना र सम्बन्ध कायम रहँदा नेपाली नागरिकता कसरी प्राप्त भयो ? नागरिकता प्राप्तिपछि यत्रो सम्पत्ति विस्तारको स्रोत के हो ? र यस्ता गम्भीर आरोपका बाबजुद सम्बन्धित सरकारी निकायहरू किन मौन देखिन्छन् ? यो विषय कुनै एक व्यक्तिको व्यक्तिगत मामिला मात्र होइन, राष्ट्रिय सुरक्षा, नागरिकता प्रणालीको विश्वसनीयता र राज्यको शासन प्रणालीसँग प्रत्यक्ष रूपमा जोडिएको गम्भीर मुद्दा हो। त्यसैले गृह मन्त्रालय, जिल्ला प्रशासन कार्यालय, अख्तियार दुरुपयोग अनुसन्धान आयोग र सम्पत्ति शुद्धीकरण अनुसन्धान विभागले निष्पक्ष, गहिरो र पारदर्शी छानबिन गर्नु अपरिहार्य देखिन्छ।
यदि यी आरोपहरू निराधार छन् भने सम्बन्धित पक्षले सार्वजनिक रूपमा प्रमाण प्रस्तुत गर्नुपर्छ। तर यदि आरोपहरू सही ठहरिए भने, जो–कोही भए पनि कानुनको दायराभित्र ल्याएर कडा कारबाही हुनुपर्छ। नागरिकता कुनै सौदाबाजीको विषय होइन—यो राष्ट्रको स्वाभिमान र भविष्यसँग जोडिएको गम्भीर प्रश्न हो।
