छठ पर्वको तयारी अन्तर्गत छपकैया छठघाटमा सरसफाइ अभियान सम्पन्न
-
संजय कुशवाहा
- today८ कार्तिक २०८२
वीरगंज, ८ कार्तिक। लोक आस्था र श्रद्धाको महान पर्व छठलाई लक्षित गर्दै सामुदायिक प्रहरी सेवा केन्द्र छपकैयाद्वारा आज बिहान छठघाटमा बृहत सरसफाइ अभियान सञ्चालन गरिएको छ। यस अभियानमा वीरगंज महानगरपालिका वडा नं. २ का वडा अध्यक्ष श्री महमद रेयाज मियाको सक्रिय नेतृत्व र सहभागिता रहेको थियो
। सरसफाइ कार्यक्रममा वडा अध्यक्ष मियासँगै सामुदायिक प्रहरी सेवा केन्द्र छपकैयाका संयोजक हाजी डा. ग्यासुदिन मिया ठकुराई, वडा सदस्यहरू, समाजसेवी, स्थानीय बासिन्दा तथा युवाहरूको उल्लेखनीय उपस्थिति थियो। अभियान अन्तर्गत छठघाट तथा आसपासका क्षेत्रहरूमा फोहर व्यवस्थापन, घाँस–झार सफाइ, पानीको निकास सुधार, र घाटको सजावटजस्ता कार्यहरू गरिएका थिए। सहभागीहरूले सामूहिक प्रयासमार्फत घाटलाई स्वच्छ, आकर्षक र भक्तिपूर्ण वातावरणमा रूपान्तरण गर्ने प्रतिबद्धता जनाए। वडा अध्यक्ष महमद रेयाज मियाले सरसफाइको महत्वबारे सम्बोधन गर्दै भने छठ पर्व हाम्रो धार्मिक आस्था, सामाजिक एकता र सांस्कृतिक पहिचानको प्रतीक हो।
यस पर्वमा स्वच्छता सबैभन्दा महत्वपूर्ण पक्ष भएकाले हामी सबै मिलेर घाट सफा र सुरक्षित बनाउन जुटेका हौं। उनीले स्थानीय बासिन्दा, स्वयंसेवक र प्रहरी सेवा केन्द्रलाई धन्यवाद ज्ञापन गर्दै छठ पर्वलाई मर्यादित, स्वच्छ र सफल बनाउन सबैको सक्रिय सहयोग आवश्यक रहेको पनि बताए। अभियानमा सहभागी स्थानीय बासिन्दाहरूले सरसफाइ कार्यप्रति खुशी व्यक्त गर्दै यस्तो पहलले वीरगंजमा धार्मिक स्थलहरूको सौन्दर्य र आस्था दुवैलाई सुदृढ बनाउने बताएका थिए। यसैबीच, सामुदायिक प्रहरी सेवा केन्द्र छपकैयाका संयोजक हाजी डा. ग्यासुदिन मिया ठकुराईले पनि आगामी दिनमा यस्ता सामाजिक तथा सरसफाइ अभियानलाई निरन्तरता दिने प्रतिबद्धता जनाएका छन्। कार्यक्रमको अन्त्यमा सहभागीहरूलाई धन्यवाद ज्ञापन गर्दै छठ पर्वको सफलताको शुभकामना दिइएको थियो।
