सहकारी ठगका अभियुक्त रवि फरार भएपछि डराएका पीडितहरूद्वारा प्रदर्शन
-
राजु कुशवाहा
- today७ आश्विन २०८२
काठमाडौं । सहकारी ठगका अभियुक्त राष्ट्रिय स्वतन्त्र पार्टी (रास्वपा)का सभापति रवि लामिछाने नख्खुबाट जेल फोडेर फरार भएपछि तनाबमा परेका सहकारी पीडितहरूले पोखरामा विरोध प्रदर्शन गरेका छन् ।
मंगलबार सहकारी पीडितहरूले प्रदर्शन गरेका हुन् । जेनजी प्रदर्शनका नाममा घुसपैठ गरेर सहकारी ठगीको मिसिल र प्रमाणहरू नष्ट गरेको भन्दै पीडितहरूले सडक प्रदर्शन गरेको जनाएका छन् ।
पीडितले पोखराको पृथ्वीचोकबाट निकालेको विरोध जुलुस शहीदचोक पुगेको छ । उनीहरूले कारागारबाट भाग्ने र भगाउनेलाई कारबाही गर, कारागारबाट भागेका सहकारी ठगीका अभियुक्तलाई तत्काल पक्राउ गर, अदालत, पोखरा महानगरको सहकारी शाखा लगायत जलाउनेलाई कारबाही गर, सहकारीको मुद्दा प्राथमिकतामा राखेर फैसला गर लगायतका नारा लगाउनुका साथै प्लाकार्ड बोकेका छन् ।
प्रदर्शनकारीले पोखरा महानगरपालिकाको कार्यालय जलाउँदा सबभन्दा पहिले सहकारी शाखामा आगो लगाएका छन् । जिल्ला अदालत र उच्च अदालतमा पनि सहकारीको मुद्दा राखिएको फाँटबाट आगो लगाएको पीडितहरूले बताएका छन् ।
सहकारी ठगीका अभियुक्तहरू प्रदर्शनमा घुसपैठ गरेर प्रमाण नष्ट गर्न खोजेको पीडितहरूको आरोप छ । सहकारी बचत पीडित संघर्ष समिति कास्कीका संयोजक किरण श्रेष्ठले नियोजित रूपमै सहकारीको फाइल जलाइएको बताए ।
