‘उज्यालो महानगर’ले फेरि गति लियो: बालेन
-
बिशाल यादब
- today७ आश्विन २०८२
काठमाडौँ – करिब तीन वर्षदेखि विभिन्न कारणले रोकिएको ‘उज्यालो महानगर’ योजनाले फेरि गति लिएको काठमाडौँ महानगरपालिकाका मेयर बालेन शाहले बताएका छन्।
मेयर शाहका अनुसार काठमाडौँ महानगरपालिकाको लगानीमा करिब १० करोड रुपैयाँको लागतमा ६२ वटा हाई मास्ट लाइट जडानको काम तीव्र गतिमा अघि बढेको छ।
हालसम्म १२ वटा हाई मास्ट लाइट जडान भइसकेका छन्। दसैँ अगाडि बाँकी सबै लाइटहरू जडान गरेर सञ्चालनमा ल्याउने तयारी भइरहेको छ। यसले मुख्य सडक तथा चोकहरूमा रात्रिकालीन सुरक्षा र आवागमनमा सहजता ल्याउने अपेक्षा गरिएको छ।
यसका साथै, अघिल्लो कार्यकालमा जडान गरिएका तर बल्न नसकेका २ हजारभन्दा बढी सौर्य ऊर्जामा आधारित सडक बत्तीलाई विद्युतीय प्रणालीमा रूपान्तरण गरी सञ्चालनमा ल्याइएको छ। यसले गर्दा पहिले अन्धकार रहेका स्थानहरूमा पनि अहिले प्रकाश पुगेको मेयर शाहको भनाइ छ।
मेयर शाहका अनुसार महानगरपालिकाले काठमाडौँलाई पूर्ण रूपमा उज्यालो बनाउने लक्ष्यका साथ करिब ८५ करोड रुपैयाँको लागतमा थप सडक बत्ती खरिद तथा जडानको तयारी पनि अन्तिम चरणमा पुर्याएको छ। यो परियोजना सम्पन्न भएपछि यसै वर्षभित्र काठमाडौँ महानगरपालिका पूर्ण रूपमा उज्यालो हुने विश्वास गरिएको छ।
