नदीमा डुबेको अवस्थामा दुई जनाको शव फेला
-
दिलखुस देवान
- today२८ भदौ २०८२
रौतहट। जितिया पर्वको (नहायखाय)का लागि व्रतालुसँगै नदीमा नुहाउने क्रममा डुबेर एक बालिकाको मृत्यु भएको छ।
गौर नगरपालिका–६ सवगढका ब्रतालुसँगै लालबकैया नदीमा नुहाउन गएकी बालिकाको शनिबार बिहान डुबेर मृत्यु भएको प्रहरीले जानकारी दिएको छ।
गौर नगरपालिका–६ बैजु साहको १० वर्षीया छोरी करिश्मा साह आमासंगै नुहाउने क्रममा शनिबार बिहान डुबेर बेपत्ता भएको खवरपाएपछि नेपाली सेना, सशस्त्र प्रहरी, नेपाल प्रहरी तथा स्थानीयले खोजी गरेका हुन्।
शनिबार बिहानदेखि खोजी गरेपनि दिउँसो बालिकाको शव फेला परेको जिल्ला प्रहरी कार्यालय रौतहटका एसपी नेत्रमणी गिरीले जानकारी दिए।
जितिया पर्वको (नहायखाय) अर्थात पवित्र जलाशयमा नुहाएर चोखो खाना खाने दिन भएको हुँदा व्रतालुसँगै बालिका पनि नदीमा नुहाउन गएको उनले बताए।
उनका अनुसार बालिकाको शव पोष्टमार्टमका लागि प्रादेशिक अस्पताल गौरमा पठाइएको छ । यसैगरी लालबकैया नदीमा पौडी खेल्न तथा नुहाउन गएका इशनाथ नगरपालिका–१ का १५ वर्षीय विगन साहको पनि शनिबार बिहान शव फेला परेको एसपी गिरीले बताए।
गत बिहीबार साथीसँग लालबकैया नदीमा पौडी खेल्न गएका साहको शव ८ किलोमिटर दक्षिणतर्फ भारतीय क्षेत्रमा फेला परेको उनले बताए। साहको शव ल्याउन भारतीय प्रहरीसंग समन्वय भइरहेको र घरका सदस्यहरु त्यसतर्फ गएको जिल्ला प्रहरी कार्यलय रौतहटले जनाएको छ।
