पशुपतिनाथ मन्दिरमा आगजनी गर्ने भन्दै पुग्यो अराजक समूह, सेना परिचालन
-
बिशाल यादब
- today२४ भदौ २०८२
काठमाडौं। पशुपतिनाथ मन्दिर क्षेत्रमा आगजनी गर्ने भन्दै अराजक समूह पुगेपछि स्थितिलाई नियन्त्रणमा लिन नेपाली सेनाको टोली खटिएको छ।
मंगलबार राति अराजक समूहले पशुपतिनाथ मन्दिरमा पुगेर ढोकामा तोडफोड गर्न थालेपछि सेना परिचालन गरिएको हो। अराजक समूहले पशुपतिनाथ मन्दिरको मूलद्वारमा आगजनी प्रयास गरेका थिए। सेनाले भीडलाई तितरबितर पारेर स्थिति नियन्त्रणमा लिएको छ।
जेनजी समूहको नाममा मंगलबार दिनभर भएको आन्दोलनमा प्रदर्शनकारीहरुले सार्वजनिक तथा निजी सम्पतिहरुमा तोडफोड तथा आगजनी गरेका थिए।
काठमाडौं उपत्यकासहित देशका विभिन्न ठाँउमा प्रदर्शनकारीबाट भएको आक्रमणको निशानामा देशको प्रमुख प्रशासनिक केन्द्र सिहदरबारलगायत महत्त्वपूर्ण भवन र संरचना क्षति भएका छन्। काठमाडौं बानेश्वरसहितका स्थानमा जेन्सी समूहबाट आयोजित प्रदर्शनपछि भड्किएको घटना र आगजनीमा कार्यपालिका, व्यवस्थापिका र न्यायपालिकाका मुख्य भवन जलेका हुन्।
सिँहदरबारस्थित प्रधानमन्त्री तथा मन्त्रिपरिषदको कार्यालय भवन, रामशाहपथस्थित सर्वोच्च अदालत र नयाँ बानेश्वरस्थित संघीय संसद् आगलागीबाट ध्वस्त भएको छ।
