सीमावर्ती क्षेत्रमा गोलीकाण्ड : भारतकी किशोरी वीरगञ्जमा घाइते
-
बिशाल यादब
- today२३ भदौ २०८२
२३ भदौ, वीरगञ्ज । नेपाल–भारत सीमावर्ती क्षेत्रमा फेरि एकपटक सुरक्षा चुनौती देखिएको छ। भारतको बिहार राज्य अन्तर्गत बेतियाकी १८ वर्षीया निशा कुमारी सहनी वीरगञ्ज भन्सार नजिकै अज्ञात व्यक्तिहरूको गोली प्रहारबाट घाइते भएकी छन्।
पर्सा प्रहरीले दिएको प्रारम्भिक जानकारी अनुसार, शनिबार बिहान वीरगञ्ज भन्सार क्षेत्रमै उनलाई लक्षित गरी गोली चलाइएको हो। घाइते किशोरी निशा, गोलु सहनीकी छोरी रहेको खुलेको छ।
घटनापछि निशालाई तत्काल उपचारका लागि नारायणी अस्पताल, वीरगञ्जमा भर्ना गरिएको छ। अस्पताल स्रोतले उनीको अवस्था सामान्य रहेको र अहिले पनि उपचार भइरहेको जानकारी दिएको छ।
हालसम्म गोली प्रहारको स्पष्ट कारण खुल्न नसके पनि पर्सा प्रहरीले घटनाबारे आवश्यक अनुसन्धान अगाडि बढाइसकेको छ। दोषीको पहिचान गरी शीघ्र कानुनी कारबाही गरिने प्रहरीको भनाइ छ।
घटनापछि नेपाली सुरक्षा निकाय घटनास्थलमा परिचालित भएका छन् भने सीमा क्षेत्रमा सुरक्षा सतर्कता समेत बढाइएको छ। यस घटनाले पुनः एकपटक नेपाल–भारत सीमावर्ती क्षेत्रको सुरक्षा व्यवस्थामाथि प्रश्न उठाएको छ।
घटनाको थप विवरण आउन बाँकी छ।
