काठमाडौँका विभिन्न स्थानमा कर्फ्यु घोषणा
-
बिशाल यादब
- today२३ भदौ २०८२
काठमाडौँ – जिल्ला प्रशासन कार्यालय काठमाडौंले थप चार ठाउँमा कर्फ्यु आदेश जारी गरेको छ।
जेनजीले गरेको आन्दोलनमा बल प्रयोग भएर अवस्था असमान्य बनेपछि प्रशासनले काठमाडौँका भीआईपी निवासआसपासका क्षेत्रमा कफ्र्य लगाएको हो। बानेश्वर क्षेत्र अशान्त बनेपछि त्यस आसपासका क्षेत्रमा यसअघि नै प्रशासनले कर्फ्यु आदेश राति १२ बजेसम्मका लागि जारी गरेको थियो।
प्रशासनले दिउँसो १ बजेदेखि राष्ट्रपति भवन शीतलनिवास, उपराष्ट्रपति भवन लैनचौर, नारायणहिटी दरबार संग्रहालय क्षेत्र र सिंहदरबार आसपासमा कफ्र्यु लगाएको हो।प्रशासनका अनुसार शीतलनिवास महाराजगन्ज क्षेत्रमा उत्तर पूर्वतर्फ राष्ट्रिय प्रहरी प्रशिक्षण प्रतिष्ठानअगाडिको चोकसम्म, पूर्वदक्षिणतर्फ सामाखुसी जाने मोडदेखि
१०० मिटर दक्षिणसम्म र दक्षिण पश्चिमतर्फ सामाखुसी जाने मोडदेखि सामाखुसी खोलासम्म कर्फ्यु लागेको छ।
त्यसैगरी हरित गृह (उपराष्ट्रपति कार्यालय) लैनचौर क्षेत्रतर्फ केशरमहल चोकदेखि लैनचौर मोड हुँदै मल्ल होटलको सिमानासम्म कर्फ्यु आदेश जारी गरिएको छ। नारायणहिटी दरबार संग्रहालय क्षेत्रमा केशरमहल चोकदेखि नारायणहिटी दरबार संग्रहालय दक्षिण गेट हुँदै जयनेपाल मोडसम्म र नारायणहिटी दरबार संग्रहालय दक्षिण गेटदेखि महेन्द्र शालिकसम्म कर्फ्यु जारी भएको छ।
सिंहदरबार क्षेत्रमा भद्रकाली मन्दिर (तीनकुने आइल्यान्ड) को पूर्वी कुनादेखि पूर्वतर्फ सिंहदरबार मूल गेटसम्म, सिंहदरबार मूलगेट अगाडिदेखि उत्तरतर्फ पद्मोदय माविको मोडसम्म, पद्मोदय मोडदेखि पूर्वतर्फ महालेखा परीक्षक कार्यालय अगाडि हुँदै अनामनगरतर्फ जाने सिंहदरबार उत्तरपूर्वी मोड र सो मोडदेखि सिंहदरबार पूर्वी गेट हुँदै हनुमानस्थान मन्दिरसम्म र सिंहदरबार मूलगेट अगाडिदेखि दक्षिणतर्फ सर्वोच्च अदालत अगाडि हुँदै पुरातत्व विभागको चोकसम्म कर्फ्यु जारी भएको जिल्ला प्रशासन कार्यालय काठमाडौँले जनाएको छ।
भीआइपी क्षेत्रमा प्रर्दशनकारीले तोडफोड गर्ने संभावना भएपछि कर्फ्यु लगाइएको हो।
