आफ्नो फेसबुक पेज हटाएपछि मेटाविरुद्ध अमेरिकी वकिल मार्कले हाले मुद्दा
-
बिशाल यादब
- today२१ भदौ २०८२
काठमाडौं । अमेरिकामा बसोबास गर्ने वकिल मार्क स्टिफन जुकरबर्ग ले सामाजिक सञ्जाल कम्पनी मेटाविरुद्ध मुद्दा दायर गरेका छन्।
फेसबुकले उनको व्यक्तिगत र व्यवसायिक पेजलाई पटक–पटक ‘मार्क जुकरबर्ग सीईओको नक्कल गरेको’ भन्दै बन्द गर्ने गरेपछि उनले इन्डियानाको म्यारियोन काउन्टीमा गत २ सेप्टेम्बरमा मुद्दा दायर गरेका हुन्।वकिल जुकरबर्गका अनुसार उनले फेसबुकमार्फत आफ्नो सेवाको प्रचार गर्न हजारौँ डलर खर्च गरे पनि बारम्बार पेज हटाइँदा व्यवसायमा ठूलो नोक्सानी भएको छ। उनले आठ वर्षमा पाँच पटक पेज डिसेबल भएको उल्लेख गर्दै “उचित व्यवहार” सम्बन्धी कानून मेटाले उल्लङ्घन गरेको आरोप लगाएका छन्।
उनले नाम जुधेका कारण जीवनमै समस्या परेको दुखेसो समेत पोखेका छन्। लगातार फोन, नोटिफिकेसन, धम्की, रेस्टुरेन्ट बुकिङमा समस्या जस्ता घटनाले त्रसित बनाएको उनको भनाइ छ। यसबारे जानकारी दिन उनले iammarkzuckerberg.com नामक वेबसाइटसमेत सञ्चालन गरेका छन्।
मेटाले भने, “संसारमा एकभन्दा बढी मार्क जुकरबर्ग छन् भन्ने कुरा हामीलाई थाहा छ, यसबारे छानबिन भइरहेको छ” भन्ने प्रतिक्रिया दिएको छ। वकिल जुकरबर्गले क्षतिपूर्ति र कानुनी शुल्क माग गरेका छन्। साथै उनले मजाक गर्दै भनेका छन्, “यदि फेसबुक सीईओ मार्क जुकरबर्गले आफ्नो सुपरयाचमा एक हप्ता बिताउन दिए, म सायद त्यो स्वीकार गर्छु।”
