खानेपानी मन्त्रीलाई फोनबाट धम्की दिएको अभियोगमा पक्राउ परेकी साह रिहा
-
अमन गुप्ता
- today१९ भदौ २०८२
१९ भदौ, काठमाडौं । खानेपानी मन्त्री प्रदिप यादवलाई फोनमार्फत धम्की दिएको आरोपमा पक्राउ परेकी महिला किरण साहलाई पर्सा अदालतले पाँच हजार रुपैयाँ धरौटीमा रिहा गरेको छ। बिहीबार अदालतको आदेशपछि धरौटी बुझाएर साह रिहा भएकी हुन्।
उनमाथि ज्यान मार्ने धम्की दिने, साइबर अपराध तथा अफवाह फैलाउने गरी तीन वटा मुद्दामा अनुसन्धान भइरहेको थियो। यो विवादको मुख्य आधार भने मन्त्री यादव र साहबीचको फोन संवाद रहेको छ।
साहले मन्त्री यादवलाई फोनमार्फत वीरगञ्जमा फैलिएको हैजाबारे जानकारी दिँदै मन्त्री जिम्मेवार रहेको बताएकी थिइन्। सार्वजनिक अडियोमा साहले मन्त्रीलाई धम्कीपूर्ण शब्द प्रयोग गरेको सुन्न सकिन्छ, जहाँ उनले आफू नडराउने र नछाड्ने भनी चेतावनी दिएको पाइन्छ।
प्रहरीका अनुसार उक्त फोन संवादको अडियो कसैले रेकर्ड गरी पत्रकारलाई दिएको थियो र त्यसलाई सम्पादन गरेर सार्वजनिक गरिएको हो। 'ज्यान से मार्दुङ्गा' भन्ने शब्द अडियोबाट काटेर प्रसारित गरिएको प्रहरीको भनाइ छ।
