१९ भदौ, काठमाडौं । नेपाल दूरसञ्चार प्राधिकरणले सूचीकरणमा नपरेका सामाजिक सञ्जाल प्लेटफर्महरू बन्द गर्न निर्देशन दिएपछि इन्टरनेट सेवा प्रदायक संघ (आईएसपान)ले उक्त आदेश पूर्ण रूपमा कार्यान्वयन गर्न भोलिसम्म समय लाग्ने जनाएको छ।
आईएसपानका अध्यक्ष सुधीर पराजुलीले अनलाइनखबरसँग कुरा गर्दै भने, “प्राधिकरणको परिपत्र हामीलाई आधिकारिक इमेलमार्फत प्राप्त भएको छ। हामी सामाजिक सञ्जालहरूलाई बन्द गर्न टेक्निकल कमिटी गठन गर्ने तयारीमा छौं। यी सञ्जालहरू पूर्ण रूपमा बन्द गर्न भोलि साँझसम्म समय लाग्न सक्छ, आजै सम्भव छैन।”
पराजुलीले सरकारले सामाजिक सञ्जालहरूलाई पूर्णरूपमा बन्द गर्नेभन्दा नियमन गर्ने दिशामा सुझाव दिएको पनि बताए।
यसअघि नेपाल दूरसञ्चार प्राधिकरणले सर्वोच्च अदालतको आदेश, मन्त्रीपरिषदको भदौ ५ गतेको निर्णय, सञ्चार तथा सूचना प्रविधि मन्त्रालयको बिहीबार भएको मन्त्रीस्तरीय निर्णय तथा सामाजिक सञ्जाल प्रयोगलाई व्यवस्थित गर्ने निर्देशिका, २०८० लाई आधार मानेर २६ वटा सामाजिक सञ्जाल प्लेटफर्म बन्द गर्न इन्टरनेट सेवा प्रदायक संघलाई निर्देशन दिएको थियो।
सरकारले फेसबुक, फेसबुक मेसेन्जर, इन्स्टाग्राम, युट्युब, ह्वाट्सएप, एक्स(ट्विटर), लिंक्डइन, स्न्यापच्याट, रेडिट, डिस्कोर्ड, पिन्टरेस्ट, सिग्नल, थ्रेड्स, वीच्याट, क्वोरा, टम्बलर, क्लबहाउस, मास्टोडन, रुम्बल, मीवी, भीके, लाइन, इमो, जालो, सोल र हाम्रो पात्रो लगायतका सामाजिक सञ्जाल बन्द गर्ने निर्णय गरेको छ।
