वीरगन्जमा हैजा र झाडापखालाको प्रकोप मत्थर हुँदै, अधिकांश बिरामी घर फर्किए
-
बिशाल यादब
- today१९ भदौ २०८२
वीरगन्ज- वीरगन्जमा फैलिएको हैजा र झाडापखालाको महामारी नियन्त्रणमा आउँदैछ।
स्वास्थ्य कार्यालय पर्साका अनुसार, उपचारपछि घर फर्किने बिरामीको संख्या बढ्दै गएको छ, जसले गर्दा अस्पतालहरूमा बिरामीको चाप कम भएको छ। मंगलबार बेलुकासम्म झाडापखालाका ९३४ बिरामी अस्पताल भर्ना भएकामा ८६२ जना पूर्ण रूपमा निको भएर घर फर्किसकेका छन्। हाल ७२ जनाको मात्र उपचार भइरहेको छ।
यसैगरी, हैजा पुष्टि भएका १९३ जना बिरामीमध्ये १८२ जना उपचारपछि घर फर्किएका छन् भने ११ जना अझै उपचाररत छन्। गत साउन २८ गतेदेखि फाटफुट रूपमा देखा परेको झाडापखालाले गत हप्ता महामारीको रूप लिएको थियो।
तर, स्वास्थ्यकर्मीको अथक प्रयासका कारण स्थिति नियन्त्रणमा आएको हो। यद्यपि, वीरगन्जमा हैजा फैलिएको स्रोत भने अझै पत्ता लाग्न सकेको छैन। स्वास्थ्यकर्मीहरूले यसको अनुसन्धान गरिरहेका छन्।
